Äskeri töñkeristen keyin M'yanmadağı ahual uşığıp baradı. Narazılardı taratu üşin policiya küş qoldanıp, qaqtığıs kezinde 230-dan astam adam qaza tapqan. 2 jarım mıñğa juıq azamat qamaldı. 

Batıs elderi men BWW Myanmadağı ahualdı sınğa alıp, biliktiñ äreketin ayıptadı. BWW-nıñ adam qwqıqtarı jönindegi joğarğı komissarı Ravina Şamdasani: «Beybit şeruge şıqqandarğa qarsı küş qoldanu azaymay twr. 37 jurnalist twtqındaldı. 19-ı äli qamauda jatır. Soñğı birneşe künniñ işinde bes adamnıñ qaza tapqanı aytıldı. Bwl resmi aqparat. Şın mäninde odan da köp boluı mümkin. Mäyitterdiñ denesine qarap olardı wrıp-soğıp, azaptap öltirgenin anıq köruge boladı. M'yanma biligin beybit şeruge şıqqandarğa qarsı küş qoldanudı toqtauğa şaqıramız», – dep mälimdedi.

1 aqpanda M'yanma äskerileri elde töñkeris jasap, biliktegi Aung San Su Çji men birneşe sayasatkerdi üyqamaqqa alğan. Äskeriler bıltır qaraşada ötken parlament saylauınıñ nätijesimen kelispegen edi. Bıltırğı saylauda Aung San Su Çji basqaratın Demokratiyaşılardıñ wlttıq ligası partiyası jeñimpaz dep tanılğan. Äskeriler saylau ädil ötpedi dep sanaydı.

Töñkeris jasağandar elde bir jıl tötenşe jağday jariyalap, bilik äsker basşısı Min Aung Hlaynnıñ qolına ötti. Äskeri töñkeriske qarsı şıqqandardıñ arasında mwğalimder, zañgerler, bank qızmetkerleri jäne memlekettik qızmetkerler, därigerler bar.

"The Qazaq Times"