Türkiya sotı 2016 jılğı iske aspay qalğan äskeri töñkeriske qatısı bar dep ayıptalğan birqatar bwrınğı äskeri qızmetkerdi ömir boyı qamau jazasına kesken. Bwğan deyin Prezident Erdoğandı sınağanı üşin 10 admiral qamauğa alınğan edi. Bwl turalı türiktiñ Anadolı aqparat agenttigi habarlağan bolatın.

Osımen bir uaqıtta «Frans Press» agenttigi öziniñ aqparat közderine süyene otırıp türik sotınıñ 22 adamdı ömir boyı bas bostandığınan ayırğanın habarladı. Sonday-aq, bas bostandığı şektelgen 22 adamnıñ derliktey bwrınğı äskeri qızmetkerler ekenin, olardıñ qatañ rejimdegi abaqtılarda wstalatını turalı jazğan.

Bwl äreketter Rejep Tayıp Erdoğandı bilikten taydıru üşin jasalğan äskeri töñkeriske 5 jıl ötkenine qaramastan oğan qatıstı qudalau men tergeu äli de belsendi küyde ekenin körsetedi.

Anadolı agenttigi taratqan mälimetterde atalğan bwrınğı äskeri qızmetkerlerge telekanaldı basıp alıp, töñkerisşiler turalı aqparat taratuğa mäjbürlegen jäne Bas ştabtı basıp alğan degen ayıptar tağılğanı aytıladı.

Şın mänisinde särsenbide ötken sot 2016 jıldan bergi ğana emes, Türkiya tarihındağı eñ auqımdı sot procesiniñ biri boldı. Onda wzın sanı 497 adamğa qatıstı ayıptar qaraldı.

Türkiya biliginde Erdoğannıñ «Ädilet jäne damu» partiyası men äskeriler arasındağı teke-tires sot procesiniñ sırtında da jürip jatır. Prezident Erdoğannıñ Bosfordtı aynalıp ötu üşin Qara teñiz ben Marmar teñizin twtastıratın kanal qazu josparına qarsı äskeriler aşıq hat jariyalağan. Oğan bwrınğı teñiz küşteri oficerlerinen 104 adamnıñ qolı qoyılğan bolatın. Alayda, düysenbide prezidenttiñ josparın sınağanı üşin solardıñ arasınan 10 admiral qamauğa alındı.

“The Qazaq Times”