Resey M'yanmağa äskeri qaru-jaraq satuın köbeytude jäne sol eldegi äskeri töñkeris jetekşisi Min Añ Laydı qoldaudı küşeytken. Sarapşılardıñ pikirinşe, bwl Reseydiñ Oñtüstik Şığıs Aziyadağı ıqpalın qaru-jaraq satu arqılı keñeytuine jol aşıp otır.

Äskeri sala men wlttıq qauipsizdik taqırıptarında zertteytin «Djeyns» tobınıñ Bangoktağı sarapşıları Mäskeudiñ Oñtüstik Şığıs Aziyadağı qadamdarına basa nazar audarıp otırğanın añğarttı. Atalğan kompaniyanıñ qauipsizdik jönindegi sarapşısı Entoni Devistiñ aytuınşa Resey aymaqtıq ekonomikalıq wyım ASEAN-men qarım-qatınastı ilgeriletuge ümittenedi, sonımen bir uaqıtta, qaru-jaraq satu arqılı öñirdegi öz ıqpalın küşeytuge de köpbirek ümit artıp otır.

«Resey M'yanmağa ğana emes, M'yanma arqılı ASEAN-ğa keñirek ornığudı közdep otır», – deydi Devis. Ol sonday-aq M'yanma isi boyınşa Qıtay men Reseydiñ ASEAN sammitin şaqıruına tañ qaludıñ qajeti joq dep sanaydı. ASEAN Mäskeu men Beyjiñ üşin barınşa tereñ baylanıs ornatqısı keletin wyım. Äri, Qıtay men Resey bwl wyımğa öz ıqpalın ornata alamız dep senedi.

Mäskeu men Beyjiñniñ bwnday senimge ie boluına özindik sebepter bar. ASEAN soñğı kezderi dağdarıstardı şeşu boyınşa älsizdik tanıtqanı üşin sınğa qalğan wyım. Onıñ üstine wyımda wyım müşeleriniñ işki isine aralaspau princivi ünemi nasihattalıp otıradı. Müşeleriniñ köbi bir partiyalı nemese äskeri bilik ıqpalındağı wyım bolğandıqtan Resey men Qıtay öz ıqpalın oñay ornatuı da mümkin.

Ärine, M'yanmadağı äskeri töñkeris bolaşaqta ekonomikalıq damu jağınan köş basşı aymaq boladı dep otırğan öñirde köptegen sınaqtı ala keldi. Bwl sınaqtardıñ auırlığı ASEAN wyımına köbirek bilinip otır. Atalğan wyım üşin öz ıqpalındağı dağdarıstı şeşu qabiletine jaña sınaq retinde körinip twr. Qıtay öziniñ öndirisi, importı men eksportına baylanıstı öñirdiñ twraqtılığına müddeli. Resey bolsa M'yanmada totalitarlıq rejim payda bolsa onı qoldauğa äzir ekenin qazirden añğartıp otır. Tipti, reseylik aqparat qwraldarı qazirdiñ özinde general Min Añ Laydı demokratiyanı qorğauşı qatarında atap jatqanı jasırın emes.

Bayqap otırğanımızday, bizge körşiles eki öñirlik derjavalar Oñtüstik Şığıs Aziyadağı jaña jağdaydı öz twrğısınan baqılauğa aluğa wmtıluda. Eñ qızığı, M'yanmadağı jağday Resey üşin asa bir tañqalarlıq tañsıq jağday bolmadı. Sebebi, äskeri töñkerister bir apta bwrın ğana Resey qorğanıs ministri Şoygu M'yanmağa saparlap qaytqan edi.

M'yanma jağdayı barğan sayın şielenise tüsude. El işinde äskerilerdiñ zorlıq-zombılıq äreketi küşeyip, M'yanmanıñ köptegen etnikalıq toptarı, onıñ işinde qarulı toptarınıñ özi äskerilerge qarsı halıqtıq qozğalısqa qoldau körsete bastadı. M'yanma dağdarısı wzaqqa sozılğan sayın ondağı derjavalardıñ oyını da swrapıl bola tüspek. Reseydiñ osı twsta M'yanmanıñ äskeri biligin qoldauı jäne qaru-jaraq satuın köbeytui onıñ sırtqı qısımdarın arttırıp qana qoymay, öñirdegi anti-reseylik közqarastı da küşeytui mümkin.

“The Qazaq Times”