Memlekettik kirister komitetiniñ basşısı Marat Swltanğaziev särsenbidegi brifingte. Foto: QR OKQ

Memlekettik kirister komitetiniñ basşısı Marat Swltanğaziev särsenbide Ortalıq kommunikaciyalar qızmetinde ötken brifing barısında «sayasi qısımğa» wşıradıq degen beyükimettik wyımdardıñ mäselesi turalı ayttı. Ol azamattıq qoğamnıñ damuına üles qosıp jürgen ärtürli bağıttağı ükimettik emes täuelsiz wyımdardıñ salıq eseptiligin tapsıru kezinde jiberilgen tehnikalıq qatelikterdiñ «formal'di» ekenin jäne zañ ayasında jazalanatının jetkizdi.

 «Qwqıq bwzuşılıqtıñ osı qwramı formal'dı bolıp sanaladı – esepti wsınbau ne key derekterdi naqtı körsetpeu. Osı formalıq negizder boyınşa, esepti wsınu merzimin bwzğanı nemese dwrıs wsınbağanı üşin Äkimşilik kodekste äkimşilik ayıppwl közdelgendikten, ayıppwl salatın bolamız», – dedi Swltanğaziev.

Ol mwnday kemşilikterdi anıqtağan tekseruşi zañnama şeñberinde, yağni Äkimşilik qwqıq bwzuşılıq turalı kodeks boyınşa hattama jasauğa mindetti ekenin aytadı. Al kodekste ayıppwldan özge qızmetin uaqıtşa toqtatu qarastırılğan. Onıñ aytuınşa, mwnday tekseris twraqtı türde jürgiziledi. Mäselen, 2018 jılı eseptilikti wsınu tärtibin bwzğan 4 ÜEW, 2019 jılı – 6 wyım, al bıltır – 16 wyım anıqtalğan körinedi. Biraq Swltanğaziev osı künge deyin atalğan wyımdardıñ qaysıbiriniñ qızmeti toqtatılğan ya toqtatılmağanı turalı swraqqa jauap bermedi. Sonday-aq, ol birqatar halıqaralıq wyımdardıñ «sayasi qısım», «kelisilgen şabuıl» degen sının teristep, joqqa şığaruğa tırıstı.

«Bizde 2018 jäne 2019 jıldarı ğana emes, jıl sayın talap qoyu merzimi şeginde de bwl jwmıs ünemi jürgiziledi. Sonımen qosa, halıqaralıq täjiribege jüginetin bolsaq, onda AQŞ, Wlıbritaniya, Izrail' siyaqtı damığan elderdiñ de ÜEW turalı zañnamasındağı normalar bizdikimen birdey. Bwl wyımdar basqa sub'ektilerge qarağanda barınşa aşıq jäne zañğa meyilinşe bağınuğa tiis. Kelip tüsken qarjını salıq esebinde körsetpegeni üşin salınatın ayıppwldıñ kölemi aytarlıqtay köp. Qatelespesem, AQŞ-ta mwnday zañ bwzuşılıqqa 10 mıñ dollarğa deyin ayıppwl kesedi», – deydi komitet törağası.

Qazaqstannıñ salıq organdarı, anığı memlekettik kirister komiteti adam qwqığın qorğaytın täuelsiz wyımdardı tekseruin toqtatpadı. Alda birneşe wyımnıñ isi sotta qaralmaq.

«Sayasi qısımğa» wşıradıq degen beyükimettik wyımdardıñ qatarında äriptesimiz, MediaNet halıqaralıq jurnalistika ortalığı jürgizetin Ortalıq Aziyadağı faktilerdi tekseru boyınşa alğaşqı resurs Factcheck.kz saytına birneşe ay qızmetin toqtatu jäne  5,5 million teñge ayıppwl salınu qaupi tönip twr.

«Qate esepti qasaqana bwrmalaudan emes, zañdıq talaptıñ özgeruinen ketkenin» aytqan wyımdar memlekettik kiris organdarı qateni jöndeu mümkindigin elemesten, täuelsiz wyımdardı jazalauğa beyil ekeni bayqaladı dep esepteydi.

«Organdar «zañbwzuşılıq» dep atağan bwl qatelerdiñ salıq tölemderine ne salıq esebine qatısı joğın, keleñsizdikten byudjetke aqşa tüspey qalmağanın, eşkimge zalal kelmegenin ayta ketken jön. Aqparattıq sipattağı esep qılmıstıq piğılmen jasalğan bwrmalau bolmasa da, kesilgen jaza tım auır. Zañğa say, mwnday zañbwzuşılıq boyınşa keyingi 2 aydağı äreket üşin ğana äkimşilik jazağa kesuge boladı. Biraq salıq organdarı bwl isti «salıq zañbwzuşılığı» retinde qarastırıp, keyingi 5 jıldı tekserip otır», – delingen Factcheck.kz saytınıñ habarlamasında.

«Salıq organdarınıñ qoğamdıq wyımdarğa mwnday qatınası Qazaqstan prezidenti Qasım-Jomart Toqaevtıñ joldauında aytqan «azamattıq qoğamdı damıtu» turalı mälimdemesi men Aqparat jäne qoğamdıq damu ministrliginiñ prezident tapsırmasımen 2025 jılğa deyin Azamattıq qoğamdı damıtu koncepciyasına degen senimdi azaytadı». © Factcheck.kz 

Osığan deyin birneşe halıqaralıq wyım men diplomatiyalıq missiya ahualğa alañdauşılıq tanıtıp otırğanın mälimdegen.

"The Qazaq Times"