Putin men Baydenniñ alğaşqı söylesui AQŞ-tıñ Reseyge qatıstı wstanımın körsete aldı ma?!

Qwrama Ştattardıñ biligine Bayden kelgennen keyin sırt közder onıñ eki elge – Qıtay men Reseyge bolğan wstanımın köbirek talqıladı. Köptegen sarapşılar Bayden ükimeti Reseyge degen AQŞ-tıñ sankciyalıq qısımın şıñday tüsedi dep boljağan. Al, ötken aptadağı Bayden men Putin arasındağı telefon arqılı söylesuden keyin bwl boljam şındıqqa jaqınday tüskendey boldı. Sarapşılar alğaşqı söylesude daulı mäselelerdiñ söz boluı Aq üydiñ Reseyge qatıstı sırtqı sayasatın tiyanaqtandıradı dep sanaydı.

Qazir Reseydegi jağday köpke belgili. Putinniñ eñ bastı sınauşısı, oppoziciyalıq sayasatker Aleksey Navalnıy belgisiz bireuler jağınan ulanıp, birer aydan keyin aman-esen Reseyge qaytıp bardı. Ärine, ol eliniñ şekarasın attay salıp qamaluı kütpegen jağday emes. Bwl Reseydegi jwz mıñdağan adamnıñ narazılığın örşitip, ereuilge şığardı. Ereul jayı da közqaraqtı jwrtqa mälim, bizdegige wqsas policeylik «wr-toqpaqtıñ» astında, mıñdağan adamnıñ qamaluımen jalğasıp jatır.

Bayden söylesu barısında Putinmen osı sezimtal mäseleni de talqılağan. Söylesuden keyin Aq üydiñ resmi mälimdemesinde de Putinmen Navalnıy mäselesiniñ talqılanuı Qwrama Ştattardıñ osı mäselege twraqtı nazar audaratının, sonday-aq, Jo Baydenniñ Navalnıy jäne onıñ jwz mıñdağan qoldauşılarımen qanday qarım-qatınasta bolatının körsetedi degen.

Navalnıy isine AQŞ Memlekettik departamenti de nazar audarıp otırğanın Baydenniñ bas diplomatı Entoni Brinken de añğarttı. Ol öziniñ mälimdemesiniñ birinde Kreml'diñ jeke adamğa bolğan mwnday qarım-qatınasına alañdauşılığın jetkizgen bolatın. «Aytıp ötkenimdey, biz Navalnıy mırzanıñ qauipsizdiginen qattı alañdaymız. Eñ mañızdısı ol köptegen reseylikterdiñ işki dauısın körsetip berdi, oğan qwlaq asu kerek», – degen Brinken.

Ärine, Uaşingtonnıñ jaña administraciyası Kreml'diñ Navalnıy isindegi wstanımın sınğa alğanımen, strategiyalıq qarulardı baqılau turalı kelisimdi bes jılğa wzartqanı üşin Putindi maqtağanı da bar. Biraq, sarapşılar Baydenniñ Reseyge qaratqan sayasatında aşıqtıq pen şınayılıq bar dep sanaydı. Aytalıq, AQŞ-tıñ Reseydegi bwrınğı elşisi Tomas Pikering: «Bayden sayasatı onıñ közqarasına säykes ayqın, ol qarsılas üşin jağımsız bolsa da şındıq.  Biraq, ol sonımen birge eki jaqtıñ da wlttıq müddeleri jatqan jerden öziniñ kütken ümitin bildirip otır. Bwl keyde ıñğaysızdıq alıp keledi», – degen pikirimen bölisken.

Ras, AQŞ pen özge de birqatar Batıs elderi Putin rejiminiñ Navalnıyge qarata wstanımın, özge de adam qwıqıqtarına qatıstı mäselelerde aşıq äri auır sındarğa aluda. Biraq, bwnıñ nätijesi qanşalıq boladı degen saual köptegen adamdı oylandıradı. Tipti, Batıs elderiniñ sınauı men mineuinen ümit az dese de boladı. Amerikalıq qoldau Reseydegi sayasi özgeristerge oñdı äser etedi deude oñ pikir emes. Bwnday pikirdi Garvard universitetiniñ professorı Tomas Remington da The Wall Streer Journal basılımına bölisken eken. Professor Remington sözinde: «Amerika Qwrama Ştattarı bizdiñ küş-jigerimiz Reseydegi sayasi özgeristerge tiimdi äser etedi dep sanaydı. Meniñ oyımşa Qwrama Ştattar mwnday qiyalınan bas tartuı kerek», – degen.

“The Qazaq Times”