AQŞ prezidenti Donal'd Tramp. Foto: https://knews.kg

AQŞ prezidenti Donal'd Tramp Djozef Baydenniñ inauguraciyası qarsañındağı qauipsizdik şaralarına baylanıstı tötenşe jağday jariyalap, Vaşingtonğa federaldı kömek jiberdi.

Bwl şeşim federaldı bilikke jedeldetilgen türde qalağa kömek retinde qarajat böluge mümkindik beredi. Ädette, memleket basşıları tabiği apattardıñ saldarın joyuğa kömektesu üşin osınday tötenşe jağday engizedi. Bwğan deyin Amerikanıñ 44-şi prezidenti Barak Obama Tramp inauguraciyasınıñ aldında mwnday qwjatqa qol qoymağan.

11 qañtarda AQŞ astanasında Baydenniñ inauguraciyasına baylanıstı qauipsizdik şaraların küşeytudi merziminen altı kün bwrın bastau turalı şeşim qabıldandı. Osığan baylanıstı Aq üy men Kongress mañında ornalasqan äkimşilik keşender, dükender men qoğamdıq tamaqtanu orındarınıñ jwmısı uaqıtşa toqtaydı.

7 qañtar AQŞ Kongresi saylauşılardıñ dauısın eseptep, 2020 jılğı prezident saylauınıñ qorıtındısın şığaru üşin jinalğan bolatın. Saylauda demokrattar partiyasınıñ ökili Djo Bayden jeñiske jetken edi. Alayda bwğan deyingi prezident Donal'd Tramptıñ jaqtastarı jappay narazılıq akciyasın bastap, olardıñ bir tobı Kongress ğimaratına basıp kirdi. Tün jarımına qaray AQŞ Kongresin jäne Senatın küzetetin policiya Tramptıñ jaqtastarın Kapitoliy aumağınan tıqsırıp şığardı. Senat ğimaratın AQŞ wlttıq wlanınıñ jasağı küzetude. Vaşingtonda komendanttıq sağat engizildi. Keyin Instagram, Facebook, Twitter jäne Youtube Donal'd Tramptıñ akkauntın blokqa qoydı. Narazılıq akciyasınan soñ AQŞ Kongresi dauıstardı sertifikattaudı jalğastıruğa dayın ekenin mälimdegen edi.

Bwl tärtipsizdikterge narazılıq retinde AQŞ äkimşiliginiñ birqatar şeneunikteri otstavkağa ketti. Olardıñ arasında transport jäne bilim salasınıñ minsitrleri bar.

"The Qazaq Times"