اقش پرەزيدەنتى دونالد ترامپ. فوتو: https://knews.kg

اقش پرەزيدەنتى دونالد ترامپ دجوزەف بايدەننىڭ يناۋگۋراتسياسى قارساڭىنداعى قاۋىپسىزدىك شارالارىنا بايلانىستى توتەنشە جاعداي جاريالاپ، ۆاشينگتونعا فەدەرالدى كومەك جىبەردى.

بۇل شەشىم فەدەرالدى بيلىككە جەدەلدەتىلگەن تۇردە قالاعا كومەك رەتىندە قاراجات بولۋگە مۇمكىندىك بەرەدى. ادەتتە، مەملەكەت باسشىلارى تابيعي اپاتتاردىڭ سالدارىن جويۋعا كومەكتەسۋ ءۇشىن وسىنداي توتەنشە جاعداي ەنگىزەدى. بۇعان دەيىن امەريكانىڭ 44-ءشى پرەزيدەنتى باراك وباما ترامپ يناۋگۋراتسياسىنىڭ الدىندا مۇنداي قۇجاتقا قول قويماعان.

11 قاڭتاردا اقش استاناسىندا بايدەننىڭ يناۋگۋراتسياسىنا بايلانىستى قاۋىپسىزدىك شارالارىن كۇشەيتۋدى مەرزىمىنەن التى كۇن بۇرىن باستاۋ تۋرالى شەشىم قابىلداندى. وسىعان بايلانىستى اق ءۇي مەن كونگرەسس ماڭىندا ورنالاسقان اكىمشىلىك كەشەندەر، دۇكەندەر مەن قوعامدىق تاماقتانۋ ورىندارىنىڭ جۇمىسى ۋاقىتشا توقتايدى.

7 قاڭتار اقش كونگرەسى سايلاۋشىلاردىڭ داۋىسىن ەسەپتەپ، 2020 جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى. الايدا بۇعان دەيىنگى پرەزيدەنت دونالد ترامپتىڭ جاقتاستارى جاپپاي نارازىلىق اكتسياسىن باستاپ، ولاردىڭ ءبىر توبى كونگرەسس عيماراتىنا باسىپ كىردى. ءتۇن جارىمىنا قاراي اقش كونگرەسىن جانە سەناتىن كۇزەتەتىن پوليتسيا ترامپتىڭ جاقتاستارىن كاپيتولي اۋماعىنان تىقسىرىپ شىعاردى. سەنات عيماراتىن اقش ۇلتتىق ۇلانىنىڭ جاساعى كۇزەتۋدە. ۆاشينگتوندا كومەندانتتىق ساعات ەنگىزىلدى. كەيىن Instagram, Facebook, Twitter جانە Youtube دونالد ترامپتىڭ اككاۋنتىن بلوكقا قويدى. نارازىلىق اكتسياسىنان سوڭ اقش كونگرەسى داۋىستاردى سەرتيفيكاتتاۋدى جالعاستىرۋعا دايىن ەكەنىن مالىمدەگەن ەدى.

بۇل تارتىپسىزدىكتەرگە نارازىلىق رەتىندە اقش اكىمشىلىگىنىڭ بىرقاتار شەنەۋنىكتەرى وتستاۆكاعا كەتتى. ولاردىڭ اراسىندا ترانسپورت جانە ءبىلىم سالاسىنىڭ مينسيترلەرى بار.

"The Qazaq Times"