Foto: icdn.lenta

Kapitoliydegi şabuıldan keyin AQŞ-ta birneşe memlekettik qızmetker öz erkimen otstavkağa kete bastadı. Bügin Aq üydegi Wlttıq Qauipsizdik Keñesiniñ tağı tört ağa qızmetkeri Vaşingtonda bolğan tärtipsizdikterden keyin qızmetinen ketti. Bwl turalı Reuters agenttigi habarladı.

Qızmetinen ketken şeneunikter qatarında Afrika isteri jönindegi ağa direktor Erin Uolş, qorğanıs sayasatı jönindegi ağa direktor Mark Vandrof, ağa direktor Entoni Rug'erro jäne Tayau Şığıs jäne Afrika isteri jönindegi ağa direktor Rob Grinuey bar. Bwğan deyin Resey jäne europalıq ister jönindegi ağa direktor Rayan Talli qızmetinen ketken.

Beysenbide AQŞ kölik ministri Eleyn Çao men AQŞ bilim departamentiniñ basşısı Betsi Devos tärtipsizdikter kezinde otstavkağa ketti. Sonımen qatar AQŞ-tıñ Soltüstik Irlandiya boyınşa arnayı ökili Mik Mulveni de qızmetten ketti. Ol bwrın Aq üy qızmetkerleriniñ apparat basşısı bolğan.

7 qañtar AQŞ Kongresi saylauşılardıñ dauısın eseptep, 2020 jılğı prezident saylauınıñ qorıtındısın şığaru üşin jinalğan bolatın. Saylauda demokrattar partiyasınıñ ökili Djo Bayden jeñiske jetken edi. Alayda bwğan deyingi prezident Donal'd Tramptıñ jaqtastarı jappay narazılıq akciyasın bastap, olardıñ bir tobı Kongress ğimaratına basıp kirdi. Tün jarımına qaray AQŞ Kongresin jäne Senatın küzetetin policiya Tramptıñ jaqtastarın Kapitoliy aumağınan tıqsırıp şığardı. Senat ğimaratın AQŞ wlttıq wlanınıñ jasağı küzetude. Vaşingtonda komendanttıq sağat engizildi. Keyin Instagram, Facebook, Twitter jäne Youtube Donal'd Tramptıñ akkauntın blokqa qoydı. Narazılıq akciyasınan soñ AQŞ Kongresi dauıstardı sertifikattaudı jalğastıruğa dayın ekenin mälimdegen edi.

Keşe Kongress Djozef Baydendi prezident saylauındağı jeñisin rastadı.o Osılayşa, 78 jastağı Djo Bayden Amerikanıñ 46-prezidenti boldı. Inauguraciya 20 qañtarğa josparlanğan. Donal'd Tramp saylau qorıtındısın moyındaudan bas tartsa da, 20 qañtarda bilikti beretinin habarladı.

Demonstranttardıñ Kongreske basıp kiruin eki jüye qwruşı partiyanıñ sayasatkerleri «Tramp wyımdastırdı» dep ayıptap otır.

"The Qazaq Times"