اقش-تاعى قاقتىعىستان كەيىن بىرنەشە شەنەۋنىك ءوز ەركىمەن وتستاۆكاعا كەتتى

كاپيتوليدەگى شابۋىلدان كەيىن اقش-تا بىرنەشە مەملەكەتتىك قىزمەتكەر ءوز ەركىمەن وتستاۆكاعا كەتە باستادى. بۇگىن اق ۇيدەگى ۇلتتىق قاۋىپسىزدىك كەڭەسىنىڭ تاعى ءتورت اعا قىزمەتكەرى ۆاشينگتوندا بولعان تارتىپسىزدىكتەردەن كەيىن قىزمەتىنەن كەتتى. بۇل تۋرالى Reuters اگەنتتىگى حابارلادى.

قىزمەتىنەن كەتكەن شەنەۋنىكتەر قاتارىندا افريكا ىستەرى جونىندەگى اعا ديرەكتور ەرين ۋولش، قورعانىس ساياساتى جونىندەگى اعا ديرەكتور مارك ۆاندروف، اعا ديرەكتور ەنتوني رۋگەررو جانە تاياۋ شىعىس جانە افريكا ىستەرى جونىندەگى اعا ديرەكتور روب گرينۋەي بار. بۇعان دەيىن رەسەي جانە ەۋروپالىق ىستەر جونىندەگى اعا ديرەكتور رايان تاللي قىزمەتىنەن كەتكەن.

بەيسەنبىدە اقش كولىك ءمينيسترى ەلەين چاو مەن اقش ءبىلىم دەپارتامەنتىنىڭ باسشىسى بەتسي دەۆوس تارتىپسىزدىكتەر كەزىندە وتستاۆكاعا كەتتى. سونىمەن قاتار اقش-تىڭ سولتۇستىك يرلانديا بويىنشا ارنايى وكىلى ميك مۋلۆەني دە قىزمەتتەن كەتتى. ول بۇرىن اق ءۇي قىزمەتكەرلەرىنىڭ اپپارات باسشىسى بولعان.

7 قاڭتار اقش كونگرەسى سايلاۋشىلاردىڭ داۋىسىن ەسەپتەپ، 2020 جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى. الايدا بۇعان دەيىنگى پرەزيدەنت دونالد ترامپتىڭ جاقتاستارى جاپپاي نارازىلىق اكتسياسىن باستاپ، ولاردىڭ ءبىر توبى كونگرەسس عيماراتىنا باسىپ كىردى. ءتۇن جارىمىنا قاراي اقش كونگرەسىن جانە سەناتىن كۇزەتەتىن پوليتسيا ترامپتىڭ جاقتاستارىن كاپيتولي اۋماعىنان تىقسىرىپ شىعاردى. سەنات عيماراتىن اقش ۇلتتىق ۇلانىنىڭ جاساعى كۇزەتۋدە. ۆاشينگتوندا كومەندانتتىق ساعات ەنگىزىلدى. كەيىن Instagram, Facebook, Twitter جانە Youtube دونالد ترامپتىڭ اككاۋنتىن بلوكقا قويدى. نارازىلىق اكتسياسىنان سوڭ اقش كونگرەسى داۋىستاردى سەرتيفيكاتتاۋدى جالعاستىرۋعا دايىن ەكەنىن مالىمدەگەن ەدى.

كەشە كونگرەسس دجوزەف بايدەندى پرەزيدەنت سايلاۋىنداعى جەڭىسىن راستادى.و وسىلايشا، 78 جاستاعى دجو بايدەن امەريكانىڭ 46-پرەزيدەنتى بولدى. يناۋگۋراتسيا 20 قاڭتارعا جوسپارلانعان. دونالد ترامپ سايلاۋ قورىتىندىسىن مويىنداۋدان باس تارتسا دا، 20 قاڭتاردا بيلىكتى بەرەتىنىن حابارلادى.

دەمونسترانتتاردىڭ كونگرەسكە باسىپ كىرۋىن ەكى جۇيە قۇرۋشى پارتيانىڭ ساياساتكەرلەرى «ترامپ ۇيىمداستىردى» دەپ ايىپتاپ وتىر.

"The Qazaq Times"