Pavlodar oblısında koronavirus jwqqan 59 adamnıñ deregi jasırılğan

Äkim Äbilqayır Sqaqov Pavlodar oblısınıñ qızıl aymaq qatarına enuiniñ sebebin tüsindiruge tırıstı. Onıñ aytuınşa, qaraşa ayınıñ basında öñirdiñ jwqtıru qateri joğarı aymaqqa aynaluına «şetelden kelgen nauqastar», sonıñ işinde körşi Reseyden kelgen azamattar äser etken. Qazan ayında oblısta koronavirus jwqtırğan 59 adamnıñ jağdayı jasırılğan. 

Bügin OrtKom alañında oblıs äkimi Äbilqayır Sqaqov brifing ötkizdi. Reseydiñ koronavirus jaylağan üş aymağımen şektesetin Kereku öñirine qazan ayı bastalğalı şekaralıq beketter arqılı 33 768 adam kirgen.

«Densaulıq saqtau jüyesiniñ materialdıq-tehnikalıq jäne kadrlıq bazasın äldeqayda nığaytqanımızdıñ arqasında jağdaydı baqılauda wstauğa mümkindik bar» dep sanaytın Sqaqov indet ahualınıñ şielenisip twrğanın moyındadı.

«Ottegi nükteleriniñ sanın altı ese wlğayttıq. Däri-därmek qorı da jetkilikti. Medicinalıq qızmetkerler rezervinde 600 adam bar. Sonday-aq, aymaqta üş medicina nısanı, onıñ biri insul't ortalığı salınıp jatır», – dedi oblıs äkimi.

QT redakciyası brifing barısında Pavlodar oblısınıñ äkimi Äbilqayır Sqaqovtan prezident Toqaev aytqan statistikanı bwrmalau faktisi boyınşa öñirde qanşa jağday jasırılğanın swradı.

– Qazan ayında 59 nauqas esepke alınbay qalğan. Statistika qazir qalpına keltirildi. Ob'ektivti mäseleler bar. Qazirgi tañda sanitarlıq-epidemiyalıq qızmettiñ baqılauında. Är fakti jeke epidemiologiyalıq tergeu jürgizildi, – dep jauap berdi redakciya tilşisiniñ saualına.

Qaraşanıñ basında anıqtalğan nauqstar sanı 30 şamasında bolğan, soñğı künderi jüzden tüspey twrğan öñir aylıq esep boyınşa ŞQO-dan keyingi ekinşi orında twr. Osı aydıñ jiırma bes küninde PTR testi arqılı 1639 adamnıñ virus jwqqanı anıqtalğan.

16 qaraşa küni prezident Toqaev «Birqatar oblıstarda  koronavirus indetine qatıstı jaña jağdaylardı jasıru derekteri anıqtalğanın» mälimdegen. Prezidenttiñ aytuınşa, statistikanı bwrmalau faktisiniñ ŞQO, SQO, Pavlodar,  Aqmola,  Qostanay oblıstarında tirkelgen, tipti «atalğan problemanıñ bizdiñ densaulıq saqtau jüyemizde de sozılmalı sipat alğanın moyındau kerek».

Komitet törağası Ayjan Esmağambetovanıñ redakciyağa bergen pikirine qarağanda, kadr tapşılığınan jükteme auırlap, derek der kezinde öñdelip-joldanbağan.

Auruhanalarda nauqastar artqan twsta virus anıqtalğandardıñ mälimetin wsınu procesi keşiktirilgen. Sol sebepti resmi statistikağa uaqtılı tirkelmegen jağdaylardıñ köbeygen körinedi. Bwl «mamannıñ jetispeuşiliginiñ saldarınan, därigerler birinşi orında emdeumen aynalısqandıqtan, qwjattamamen jwmıs biraz bögelgen» dep tüsindiredi.

«Bwl oblıstarda auırğan adamdar sanı men zerthanalıq zertteulerdiñ oñ nätijelerin esepke alu derekteri boyınşa qatelikter jiberilgeni anıqtaldı. ...Zerthana qızmetinde oñ nätijelerdi, jürgizilgen PTR zertteulerdiñ dwrıstığın uaqtılı esepke alu, tirkeu jäne beru boyınşa test jürgizu kezindegi kemşilikter; kelip tüsken şwğıl habarlamalardı kadrlardıñ jetispeuine baylanıstı olardı uaqtılı öñdemeu siyaqtı olqılıqtar anıqtaldı», – delingen resmi jauapta.

Esmağambetovanıñ mälimetinşe, kemşilik jibergeni üşin Şığıs Qazaqstan oblısında basşılar tärtiptik jauapkerşilikke tartılğan.

Toqaev atağan öñirlerde naqtı qanday bwrmalauşılıqtar bolğanı, qanşa jağday jasırılğanı jäne bwğan baylanıstı jauapqa tartılğandar, qozğalğan is sanı jönindegi mälimet äzirge belgisiz. Aqordanıñ baspasöz qızmeti bwl turalı Densaulıq saqtau ministrligi jariyalaytının aytadı.

Sanitariyalıq-epidemiologiyalıq baqılau komitetiniñ resmi ökili ministrlik osı mäselege arnap jeke mälimdeme jasaytının habarladı. Erteñ, 27 qaraşa küni bir jarım aydan beri qoğam men BAQ ökilderi aldına şıqpay jürgen densaulıq saqtau ministri Aleksey Coy äriptesterimen birge baspasöz jiının ötkizetini mälim boldı. Prezident sınına ilikken öñirler turalı sonda taratıp aytuı mümkin.

"The Qazaq Times"