پاۆلودار وبلىسىندا كوروناۆيرۋس جۇققان 59 ادامنىڭ دەرەگى جاسىرىلعان

اكىم ابىلقايىر سقاقوۆ پاۆلودار وبلىسىنىڭ قىزىل ايماق قاتارىنا ەنۋىنىڭ سەبەبىن تۇسىندىرۋگە تىرىستى. ونىڭ ايتۋىنشا، قاراشا ايىنىڭ باسىندا ءوڭىردىڭ جۇقتىرۋ قاتەرى جوعارى ايماققا اينالۋىنا «شەتەلدەن كەلگەن ناۋقاستار»، سونىڭ ىشىندە كورشى رەسەيدەن كەلگەن ازاماتتار اسەر ەتكەن. قازان ايىندا وبلىستا كوروناۆيرۋس جۇقتىرعان 59 ادامنىڭ جاعدايى جاسىرىلعان. 

بۇگىن ورتكوم الاڭىندا وبلىس اكىمى ابىلقايىر سقاقوۆ بريفينگ وتكىزدى. رەسەيدىڭ كوروناۆيرۋس جايلاعان ءۇش ايماعىمەن شەكتەسەتىن كەرەكۋ وڭىرىنە قازان ايى باستالعالى شەكارالىق بەكەتتەر ارقىلى 33 768 ادام كىرگەن.

«دەنساۋلىق ساقتاۋ جۇيەسىنىڭ ماتەريالدىق-تەحنيكالىق جانە كادرلىق بازاسىن الدەقايدا نىعايتقانىمىزدىڭ ارقاسىندا جاعدايدى باقىلاۋدا ۇستاۋعا مۇمكىندىك بار» دەپ سانايتىن سقاقوۆ ىندەت احۋالىنىڭ شيەلەنىسىپ تۇرعانىن مويىندادى.

«وتتەگى نۇكتەلەرىنىڭ سانىن التى ەسە ۇلعايتتىق. ءدارى-دارمەك قورى دا جەتكىلىكتى. مەديتسينالىق قىزمەتكەرلەر رەزەرۆىندە 600 ادام بار. سونداي-اق، ايماقتا ءۇش مەديتسينا نىسانى، ونىڭ ءبىرى ينسۋلت ورتالىعى سالىنىپ جاتىر»، – دەدى وبلىس اكىمى.

QT رەداكتسياسى بريفينگ بارىسىندا پاۆلودار وبلىسىنىڭ اكىمى ابىلقايىر سقاقوۆتان پرەزيدەنت توقاەۆ ايتقان ستاتيستيكانى بۇرمالاۋ فاكتىسى بويىنشا وڭىردە قانشا جاعداي جاسىرىلعانىن سۇرادى.

– قازان ايىندا 59 ناۋقاس ەسەپكە الىنباي قالعان. ستاتيستيكا قازىر قالپىنا كەلتىرىلدى. وبەكتيۆتى ماسەلەلەر بار. قازىرگى تاڭدا سانيتارلىق-ەپيدەميالىق قىزمەتتىڭ باقىلاۋىندا. ءار فاكتى جەكە ەپيدەميولوگيالىق تەرگەۋ جۇرگىزىلدى، – دەپ جاۋاپ بەردى رەداكتسيا ءتىلشىسىنىڭ ساۋالىنا.

قاراشانىڭ باسىندا انىقتالعان ناۋقستار سانى 30 شاماسىندا بولعان، سوڭعى كۇندەرى جۇزدەن تۇسپەي تۇرعان ءوڭىر ايلىق ەسەپ بويىنشا شقو-دان كەيىنگى ەكىنشى ورىندا تۇر. وسى ايدىڭ جيىرما بەس كۇنىندە پتر تەستى ارقىلى 1639 ادامنىڭ ۆيرۋس جۇققانى انىقتالعان.

16 قاراشا كۇنى پرەزيدەنت توقاەۆ «بىرقاتار وبلىستاردا  كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالعانىن» مالىمدەگەن. پرەزيدەنتتىڭ ايتۋىنشا، ستاتيستيكانى بۇرمالاۋ فاكتىسىنىڭ شقو، سقو، پاۆلودار،  اقمولا،  قوستاناي وبلىستارىندا تىركەلگەن، ءتىپتى «اتالعان پروبلەمانىڭ ءبىزدىڭ دەنساۋلىق ساقتاۋ جۇيەمىزدە دە سوزىلمالى سيپات العانىن مويىنداۋ كەرەك».

كوميتەت توراعاسى ايجان ەسماعامبەتوۆانىڭ رەداكتسياعا بەرگەن پىكىرىنە قاراعاندا، كادر تاپشىلىعىنان جۇكتەمە اۋىرلاپ، دەرەك دەر كەزىندە وڭدەلىپ-جولدانباعان.

اۋرۋحانالاردا ناۋقاستار ارتقان تۇستا ۆيرۋس انىقتالعانداردىڭ مالىمەتىن ۇسىنۋ پروتسەسى كەشىكتىرىلگەن. سول سەبەپتى رەسمي ستاتيستيكاعا ۋاقتىلى تىركەلمەگەن جاعدايلاردىڭ كوبەيگەن كورىنەدى. بۇل «ماماننىڭ جەتىسپەۋشىلىگىنىڭ سالدارىنان، دارىگەرلەر ءبىرىنشى ورىندا ەمدەۋمەن اينالىسقاندىقتان، قۇجاتتامامەن جۇمىس ءبىراز بوگەلگەن» دەپ تۇسىندىرەدى.

«بۇل وبلىستاردا اۋىرعان ادامدار سانى مەن زەرتحانالىق زەرتتەۋلەردىڭ وڭ ناتيجەلەرىن ەسەپكە الۋ دەرەكتەرى بويىنشا قاتەلىكتەر جىبەرىلگەنى انىقتالدى. ...زەرتحانا قىزمەتىندە وڭ ناتيجەلەردى، جۇرگىزىلگەن پتر زەرتتەۋلەردىڭ دۇرىستىعىن ۋاقتىلى ەسەپكە الۋ، تىركەۋ جانە بەرۋ بويىنشا تەست جۇرگىزۋ كەزىندەگى كەمشىلىكتەر; كەلىپ تۇسكەن شۇعىل حابارلامالاردى كادرلاردىڭ جەتىسپەۋىنە بايلانىستى ولاردى ۋاقتىلى وڭدەمەۋ سياقتى ولقىلىقتار انىقتالدى»، – دەلىنگەن رەسمي جاۋاپتا.

ەسماعامبەتوۆانىڭ مالىمەتىنشە، كەمشىلىك جىبەرگەنى ءۇشىن شىعىس قازاقستان وبلىسىندا باسشىلار تارتىپتىك جاۋاپكەرشىلىككە تارتىلعان.

توقاەۆ اتاعان وڭىرلەردە ناقتى قانداي بۇرمالاۋشىلىقتار بولعانى، قانشا جاعداي جاسىرىلعانى جانە بۇعان بايلانىستى جاۋاپقا تارتىلعاندار، قوزعالعان ءىس سانى جونىندەگى مالىمەت ازىرگە بەلگىسىز. اقوردانىڭ ءباسپاسوز قىزمەتى بۇل تۋرالى دەنساۋلىق ساقتاۋ مينيسترلىگى جاريالايتىنىن ايتادى.

سانيتاريالىق-ەپيدەميولوگيالىق باقىلاۋ كوميتەتىنىڭ رەسمي وكىلى مينيسترلىك وسى ماسەلەگە ارناپ جەكە مالىمدەمە جاسايتىنىن حابارلادى. ەرتەڭ، 27 قاراشا كۇنى ءبىر جارىم ايدان بەرى قوعام مەن باق وكىلدەرى الدىنا شىقپاي جۇرگەن دەنساۋلىق ساقتاۋ ءمينيسترى الەكسەي تسوي ارىپتەستەرىمەن بىرگە ءباسپاسوز جيىنىن وتكىزەتىنى ءمالىم بولدى. پرەزيدەنت سىنىنا ىلىككەن وڭىرلەر تۋرالى سوندا تاراتىپ ايتۋى مۇمكىن.

"The Qazaq Times"