«Nemkettige» saluğa bolar edi, alayda AQŞ prezidenti kim boladı degen dau Qwrama Ştattardan alqıp şığıp, bizdiñ aramızğa da jetkendey.  Birqatar amerikalıq basılımdar Jozef Baydendi AQŞ-tıñ kelesi prezidenti qatarında atap jatqanımen, Aq üyde bilik auısuğa degen eşqanday dayındıq joq. Anığında AQŞ-tıñ saylauda jeñgen prezidentin resmi atauğa qwzireti bar eki ğana organ bar, oğan qaramastan birqatar basılımdardıñ Baydendi prezident qatarında aytıp jatuı sol eldegi sayasi toptar arasındağı aqparattıq tartıstıñ bir wşı bolsa kerek.

Sonımen Trampqa keleyik, Tramp Baydendi jeñdi dep eseptemeydi. Oğan qosa onıñ äkimşiligi men Respublikaşıl partiya keybir ştattardağı saylau nätijesine qatıstı uäjderimen sotqa qayrılıp otır. Baydendi aytsaq, Aq üydegi äkimşisin tağayındap, aldağı jwmıstarına qauırt dayındığın bastap ketken. Tipti, prezident retinde alğaşqı qolğa alatın jwmısı indetpen qalay küresetinin de toptı ortada mälimdep, kädimgi prezidenttey kiriskeni bayqaladı. Nätije de «Demokratiya ülgisi» Qwrama Ştattarda prezidenttik saylauda osında belgisizdik qalıptasıp otır.

AQŞ-tıñ federaldıq zañı saylaudan keyin bilik almasuın qamtamasız etudi Jalpı qızmetter äkimşiligine JQÄ (General Services Administration)  jükteydi. Ol federaldıq organ qatarında saylaudıñ jeñimpazın moyındamasa, eşqanday bilik almasu bolmaydı. Jay künde bar joğı bilinbeytin bwl organ federaldı ükimet departamentterdiñ negizgi bağdarlamaların, sonıñ işinde bilik almasuına qatıstı mäselelerge jauap beredi. Tap qazir osı organdı basqarıp otırğan Emili Merfidi Tramp tağayındağan. Ol Baydenniñ 2020 jılğı saylaudağı jeñisin rastağan joq.

Emili Merfi rastamasa Baydennıñ ötpeli jwmıs tobı öz jwmıstarın tiimdi jürgize almaydı. Bılayşa aytqanda, federaldıq ükimet wsınğan qarajattardı igere almaydı, sayasi jağdaydı bağamdau üşin türli departamentterge kire almaydı, wlttıq qauipsizdik turasındağı mälimetterge qol jetkize almaydı jäne Bayden komandasındağı adamdar özderi belgilengen lauazımdı qızmetterge dayındıq jwmıstarın jürgize almaydı.

JQÄ saylaudıñ jalpı qorıtındısı äli de belgisizdikterge tolı bolğandıqtan, soñğı qorıtındınıñ şıqpağanın mälimdedi. Atalğan äkimşilik biılğı prezident saylauı 2000 jılğı saylau procesine wqsaytının alğa tarttı. Kişi Buş pen Alberd Gordıñ Floridadağı dauına baylanıstın JQÄ Buştıñ saylauda jeñiske jetkenin Joğarı sottıñ 13 jeltoqsandağı şeşiminen keyin ğana moyındağan bolatın.

Tramp äkimşiligi qalıptı jwmısın jalğastırıp jatqanday. Ötken aptada memlekettik hatşı Maykl Pompeo Tramp äkimşiliginiñ ekinşi kezeñge eşqanday qiındıqsız ötetinin aytqan.

“The Qazaq Times”