Körneki suret. Foto: Kazakh-TV

Qazaqstan pandemiyanıñ boljaldı küzgi tolqınına dayındıqtı küşeyte bastağanday. Mwnıñ sayasi astarı bar ma? Arada bir jwma ötpey Mañğıstau oblısınıñ bas sanitar-därigeri Ğaziz Naduev 23 qazannan bastap aymaqta karantin şekteuleri jeñildeytinin mälimdedi.  

Qoğamdıq densaulıq saqtau basqarmasınıñ basşısı jariyalağan qaulığa säykes, epidemiya  jağdayınıñ twraqtaluına baylanıstı öñirdegi köpşilikke arnalğan tamaqtanu orındarınıñ jwmısı 21:00 den 22:00 deyin wzartıladı. Biraq adam sıyımdılığı 30 adamnan aspauı qajet. Sonımen qatar, jeke ornalasqan sauda alañdarına 22:00-ge deyn jwmıs isteuge rwqsat etildi. Dini nısandardıñ jamağat jimay jwmıs isteuine rwqsat. Sport ortalıqtarı, onıñ işinde fitnes orındarı jattığuşılar sanı 30 payızdan asırmau talabımen jwmısın jalğastıradı. Mektepke deyingi bilim beru ortalıqtarınıñ kezekşi toptarına qoyılğan şekteu alındı. Biraq är topta 15 baladan aspauı qajet. Pandemiya bastalğalı dağdarıstan köz aşpay, twralap qalğan kinotetarlar aldağı düysenbiden  şekteu jäne sanitarlıq talaptarmen jwmısın qayta bastamaq. Jwmıs künderi sağat 22:00-ge; senbi küni sağat 17:00-ge deyin kinozaldar üşten bir böligin körermen toltıruğa rwqsat etilgenimen, – jeksenbi jabıq boladı.

Biraq köpten beri qızmeti şektelgen oyın-sauıq mekemeleri, bala-baqşa, komp'yuterlik klubtar, qosımşa bilim beru ortalıqtarına qatıstı şekteu erejeleri özgergen joq.

Osılayşa ötken seysenbi, 13 qazan küni engizilgen şekteu birşama jeñildemek. Keyingi kezderi Qazaqstan Ükimeti jäne Vedomstvoaralıq komissiya pandemiya jağdayına baylanıstı logika qisınına kelmeytin kereağar şeşimder şığarıp keledi. Mäselen, azamattıq qoğam belsendileriniñ beybit jiın ötkizuine şekteu qoyılıp, biraq sağattap kinotetarlarda fil'm tamaşalauğa mümkindik berilmek. Sarapşılar men äleumettik jeli qoldanuşılar mwnıñ sebebin qañtar ayına josparlanğan Mäjilis jäne Mäslihattar saylauımen baylanıstıradı.

Ötken aptanıñ beysenbisinen beri respublikanıñ är aymaqtarında karantin erejeleri jañartıldı. Qazannıñ 15-i SQO, Aqmola, Atırau oblıstarı men Almatı qalasında, al 16 qazan BQO, Pavlodar, ŞQO öñirleri jäne astanada, 17-si Almatı, Jambıl, Qarağandı oblıstarıneda, 19 qazan Qostanay, 21 qazan Aqtöbe, 22 qazan BQO aymaqtarında karantin şaraları küşeygen.

"The Qazaq Times"