قازاقستان پاندەميانىڭ بولجالدى كۇزگى تولقىنىنا دايىندىقتى كۇشەيتە باستاعانداي. مۇنىڭ ساياسي استارى بار ما؟ ارادا ءبىر جۇما وتپەي ماڭعىستاۋ وبلىسىنىڭ باس سانيتار-دارىگەرى عازيز نادۋەۆ 23 قازاننان باستاپ ايماقتا كارانتين شەكتەۋلەرى جەڭىلدەيتىنىن مالىمدەدى.  

قوعامدىق دەنساۋلىق ساقتاۋ باسقارماسىنىڭ باسشىسى جاريالاعان قاۋلىعا سايكەس، ەپيدەميا  جاعدايىنىڭ تۇراقتالۋىنا بايلانىستى وڭىردەگى كوپشىلىككە ارنالعان تاماقتانۋ ورىندارىنىڭ جۇمىسى 21:00 دەن 22:00 دەيىن ۇزارتىلادى. بىراق ادام سىيىمدىلىعى 30 ادامنان اسپاۋى قاجەت. سونىمەن قاتار، جەكە ورنالاسقان ساۋدا الاڭدارىنا 22:00-گە دەين جۇمىس ىستەۋگە رۇقسات ەتىلدى. ءدىني نىسانداردىڭ جاماعات جيماي جۇمىس ىستەۋىنە رۇقسات. سپورت ورتالىقتارى، ونىڭ ىشىندە فيتنەس ورىندارى جاتتىعۋشىلار سانى 30 پايىزدان اسىرماۋ تالابىمەن جۇمىسىن جالعاستىرادى. مەكتەپكە دەيىنگى ءبىلىم بەرۋ ورتالىقتارىنىڭ كەزەكشى توپتارىنا قويىلعان شەكتەۋ الىندى. بىراق ءار توپتا 15 بالادان اسپاۋى قاجەت. پاندەميا باستالعالى داعدارىستان كوز اشپاي، تۇرالاپ قالعان كينوتەتارلار الداعى دۇيسەنبىدەن  شەكتەۋ جانە سانيتارلىق تالاپتارمەن جۇمىسىن قايتا باستاماق. جۇمىس كۇندەرى ساعات 22:00-گە; سەنبى كۇنى ساعات 17:00-گە دەيىن كينوزالدار ۇشتەن ءبىر بولىگىن كورەرمەن تولتىرۋعا رۇقسات ەتىلگەنىمەن، – جەكسەنبى جابىق بولادى.

بىراق كوپتەن بەرى قىزمەتى شەكتەلگەن ويىن-ساۋىق مەكەمەلەرى، بالا-باقشا، كومپيۋتەرلىك كلۋبتار، قوسىمشا ءبىلىم بەرۋ ورتالىقتارىنا قاتىستى شەكتەۋ ەرەجەلەرى وزگەرگەن جوق.

وسىلايشا وتكەن سەيسەنبى، 13 قازان كۇنى ەنگىزىلگەن شەكتەۋ ءبىرشاما جەڭىلدەمەك. كەيىنگى كەزدەرى قازاقستان ۇكىمەتى جانە ۆەدومستۆوارالىق كوميسسيا پاندەميا جاعدايىنا بايلانىستى لوگيكا قيسىنىنا كەلمەيتىن كەرەاعار شەشىمدەر شىعارىپ كەلەدى. ماسەلەن، ازاماتتىق قوعام بەلسەندىلەرىنىڭ بەيبىت جيىن وتكىزۋىنە شەكتەۋ قويىلىپ، بىراق ساعاتتاپ كينوتەتارلاردا فيلم تاماشالاۋعا مۇمكىندىك بەرىلمەك. ساراپشىلار مەن الەۋمەتتىك جەلى قولدانۋشىلار مۇنىڭ سەبەبىن قاڭتار ايىنا جوسپارلانعان ءماجىلىس جانە ءماسليحاتتار سايلاۋىمەن بايلانىستىرادى.

وتكەن اپتانىڭ بەيسەنبىسىنەن بەرى رەسپۋبليكانىڭ ءار ايماقتارىندا كارانتين ەرەجەلەرى جاڭارتىلدى. قازاننىڭ 15-ءى سقو، اقمولا، اتىراۋ وبلىستارى مەن الماتى قالاسىندا، ال 16 قازان بقو، پاۆلودار، شقو وڭىرلەرى جانە استانادا، 17-ءسى الماتى، جامبىل، قاراعاندى وبلىستارىنەدا، 19 قازان قوستاناي، 21 قازان اقتوبە، 22 قازان بقو ايماقتارىندا كارانتين شارالارى كۇشەيگەن.

"The Qazaq Times"