Taulı Qarabaq üşin şayqastıñ 11-şi küni swrapıl jürildi. Foto: BBC,.

Taulı Qarabaqtağı qaqtığıstan keyin mıñdağan bosqın Armeniyanı qaray ağıluda. Qazir Armeniyanıñ Goris qalasında bosqındarğa arnalğan uaqıttıq twraqtar aşıla bastağan.

Taulı Qarabaq üşin soğıstıñ 11-şi küni adam şığını köbeye tüsti. Bir künde Armeniya tarabınan 80 äskerdiñ qaza bolğanı belgili bolğan. Bwnı moyındalmağan Taulı Qarabaq respublikasınıñ Qorğanıs ministrligi jariya etken. Biraq, bwl sandardı basqa mälimet közderi arqılı anıqtau qazirşe mümkin emes. Al, Äzirbayjan tarabı qaqtığıs toqtağannan keyin ğana soğıs şığını turalı anıq mälimet beretinderin mälimdedi.

Taulı Qarabaq üşin soğıstıñ qarqını 7 qazan küni qayta küşeydi. Armeniya Qorğanıs ministrligi atıstıñ tünimen tolastamağanın rastadı. Osıdan eki kün bwrın aua rayına baylanıstı Äzirbayjan tarabınan wşqışsız wşaqtarmen atqılau azayğan edi. Bwnı Resey telearnaları Äzirbayjannıñ soğıstı toqtatuğa degen qadamı dep boljap jatqan. Alayda, orıs aqparat qwraldarınıñ bwl boljamı şındıqqa say bolmay şıqtı.

Armeniya qorğanıs ministri Ovannisyan keşegi mälimdemesinde Armeniya tarabı bwğan deyin ayırılıp qalğan bekinisterin qaytarıp alğanın aytqan. Biraq, naqtı qay aymaqtardı qaytarıp alğanın anıq jetkizgen joq. Äzirbayjan tarabı äskeri tehnikalar men wşqışsız wşaqtardı auqımdı deñgeyde paydalanıp jatır. Osığan qarap Qarabaq üşin qaqtığıstağı Baku tarabınıñ basımdığın bayqauğa boladı.

BBC mälimetine sensek, Armeniya tarabına 70 mıñğa juıq bosqın qaşıp ötken. Äleumettik jelilerde äzirbayjan jauıngerlerdiñ özderi qolğa keltirgen eldi mekenderde eliniñ bayrağın tigip jatqan videolar köbeydi. Alayda, Äzirbayjannıñ özge qalalarına Armeniya taraptan zımıran şabuıldarınıñ bolıp jatqanı aytıluda.

“The Qazaq Times”