تاۋلى قاراباق ءۇشىن شايقاستىڭ 11-ءشى كۇنى سۇراپىل ءجۇرىلدى. فوتو: BBC,.

تاۋلى قاراباقتاعى قاقتىعىستان كەيىن مىڭداعان بوسقىن ارمەنيانى قاراي اعىلۋدا. قازىر ارمەنيانىڭ گوريس قالاسىندا بوسقىندارعا ارنالعان ۋاقىتتىق تۇراقتار اشىلا باستاعان.

تاۋلى قاراباق ءۇشىن سوعىستىڭ 11-ءشى كۇنى ادام شىعىنى كوبەيە ءتۇستى. ءبىر كۇندە ارمەنيا تارابىنان 80 اسكەردىڭ قازا بولعانى بەلگىلى بولعان. بۇنى مويىندالماعان تاۋلى قاراباق رەسپۋبليكاسىنىڭ قورعانىس مينيسترلىگى جاريا ەتكەن. بىراق، بۇل سانداردى باسقا مالىمەت كوزدەرى ارقىلى انىقتاۋ قازىرشە مۇمكىن ەمەس. ال، ءازىربايجان تارابى قاقتىعىس توقتاعاننان كەيىن عانا سوعىس شىعىنى تۋرالى انىق مالىمەت بەرەتىندەرىن مالىمدەدى.

تاۋلى قاراباق ءۇشىن سوعىستىڭ قارقىنى 7 قازان كۇنى قايتا كۇشەيدى. ارمەنيا قورعانىس مينيسترلىگى اتىستىڭ تۇنىمەن تولاستاماعانىن راستادى. وسىدان ەكى كۇن بۇرىن اۋا رايىنا بايلانىستى ءازىربايجان تارابىنان ۇشقىشسىز ۇشاقتارمەن اتقىلاۋ ازايعان ەدى. بۇنى رەسەي تەلەارنالارى ءازىربايجاننىڭ سوعىستى توقتاتۋعا دەگەن قادامى دەپ بولجاپ جاتقان. الايدا، ورىس اقپارات قۇرالدارىنىڭ بۇل بولجامى شىندىققا ساي بولماي شىقتى.

ارمەنيا قورعانىس ءمينيسترى وۆاننيسيان كەشەگى مالىمدەمەسىندە ارمەنيا تارابى بۇعان دەيىن ايىرىلىپ قالعان بەكىنىستەرىن قايتارىپ العانىن ايتقان. بىراق، ناقتى قاي ايماقتاردى قايتارىپ العانىن انىق جەتكىزگەن جوق. ءازىربايجان تارابى اسكەري تەحنيكالار مەن ۇشقىشسىز ۇشاقتاردى اۋقىمدى دەڭگەيدە پايدالانىپ جاتىر. وسىعان قاراپ قاراباق ءۇشىن قاقتىعىستاعى باكۋ تارابىنىڭ باسىمدىعىن بايقاۋعا بولادى.

BBC مالىمەتىنە سەنسەك، ارمەنيا تارابىنا 70 مىڭعا جۋىق بوسقىن قاشىپ وتكەن. الەۋمەتتىك جەلىلەردە ءازىربايجان جاۋىنگەرلەردىڭ وزدەرى قولعا كەلتىرگەن ەلدى مەكەندەردە ەلىنىڭ بايراعىن تىگىپ جاتقان ۆيدەولار كوبەيدى. الايدا، ءازىربايجاننىڭ وزگە قالالارىنا ارمەنيا تاراپتان زىمىران شابۋىلدارىنىڭ بولىپ جاتقانى ايتىلۋدا.

“The Qazaq Times”