Kadr tapşılığı men jwmıstıñ kürt auırlauınan qajığan meyirbike. Foto: TASS / AP

Eñbek jäne halıqtı äleumettik qorğau ministrligi bügin pandemiya kezinde koronavirus pen onıñ pnevmoniya türin jwqtırğan 4,5 mıñğa juıq medicina qızmetkerine jäne qaytıs bolğan 45 kadrdıñ tuıstarına memleket tarapınan ötemaqı tölengenin habarladı.

Memlekettik äleumettik saqtandıru qorınan pandemiya bastalğalı beri 4494 medqızmetkerge 2 mln, al qızmet barısında auırıp-qaytqan 45 adamnıñ tuıstarına 10 mln teñgeden birjolğı äleumettik tölem berilgen.

Ötemaqı töleu turalı şeşimdi öñirler men üş megapolistiñ densaulıq saqtau basqarmaları janındağı arnayı komissiya qabıldaydı. Al ötinimderdi jinaqtaudı Densaulıq saqtau ministrligi jüzege asıradı. Mamandar ötinim tirkeu jäne räsimdeu mehanizminiñ jetilmegenin, jekelegen ister bayau qaralatının aytadı.

COVID-19 virusın jwqtırğan jäne onıñ asqınğan türi pnevmoniyağa şaldığıp, tölem alğan medqızmetkerlerdiñ aymaqtardağı sanı:

  • astanada – 905,
  • Almatı qalasında – 499,
  • Qarağandı oblısında – 409,
  • Şığıs Qazaqstan oblısında – 388,
  • Atırau oblısında – 336,
  • Aqmola oblısında – 329.

Pandemiya bastalğalı beri Qazaqstanda mıñdağan medqızmetker virus jwqtırğan, 180-nen astamı ömirden ötken. Biraq bilik olardıñ bärine birdey ötemaqı bermeydi. Qızmetten tıs kezde jwqtırğandardı swrıptap qaraydı. Sarapşılar talğau-tekseru tetigi ötemaqını azaytudıñ amalına aynaldı dep sanaydı.

Qwqıqtıq talap boyınşa nauqastan medqızmetker auırğanın däleldeuge keminde 40 qwjat jinauı qajet. Jergilikti komissiyalardıñ jwmısı bayau. Qazan ayınıñ basındağı resmi derekke qarağanda, Qazaqstanda 12 830 medicina qızmetkeri koronavirus jwqtırğan, onıñ 8333-i qızmet barısında auırğan. Ükimet basşısı Asqar Maminniñ 4 qazanda wsınğan mälimetinşe, qazirgi tañda epidemiyağa qarsı 46 mıñnan astam medicina qızmetkeri tartılğan. DenMin men EñbekMin qırküyek ayınıñ ayağına deyin ötinimdi tirkeu jäne tölem tağayındau jwmısında sılbır bolğanı üşin ötken aptada parlament deputattarı jäne qoğam tarapınan sınğa wşırağan.

"The Qazaq Times"