وتكەن تولقىندا اۋىرعان مەدقىزمەتكەرلەرگە وتەماقى تولىق بەرىلمەگەن

ەڭبەك جانە حالىقتى الەۋمەتتىك قورعاۋ مينيسترلىگى بۇگىن پاندەميا كەزىندە كوروناۆيرۋس پەن ونىڭ پنەۆمونيا ءتۇرىن جۇقتىرعان 4,5 مىڭعا جۋىق مەديتسينا قىزمەتكەرىنە جانە قايتىس بولعان 45 كادردىڭ تۋىستارىنا مەملەكەت تاراپىنان وتەماقى تولەنگەنىن حابارلادى.

مەملەكەتتىك الەۋمەتتىك ساقتاندىرۋ قورىنان پاندەميا باستالعالى بەرى 4494 مەدقىزمەتكەرگە 2 ملن، ال قىزمەت بارىسىندا اۋىرىپ-قايتقان 45 ادامنىڭ تۋىستارىنا 10 ملن تەڭگەدەن بىرجولعى الەۋمەتتىك تولەم بەرىلگەن.

وتەماقى تولەۋ تۋرالى شەشىمدى وڭىرلەر مەن ءۇش مەگاپوليستىڭ دەنساۋلىق ساقتاۋ باسقارمالارى جانىنداعى ارنايى كوميسسيا قابىلدايدى. ال وتىنىمدەردى جيناقتاۋدى دەنساۋلىق ساقتاۋ مينيسترلىگى جۇزەگە اسىرادى. ماماندار ءوتىنىم تىركەۋ جانە راسىمدەۋ مەحانيزمىنىڭ جەتىلمەگەنىن، جەكەلەگەن ىستەر باياۋ قارالاتىنىن ايتادى.

COVID-19 ۆيرۋسىن جۇقتىرعان جانە ونىڭ اسقىنعان ءتۇرى پنەۆمونياعا شالدىعىپ، تولەم العان مەدقىزمەتكەرلەردىڭ ايماقتارداعى سانى:

• استانادا – 905,
• الماتى قالاسىندا – 499,
• قاراعاندى وبلىسىندا – 409,
• شىعىس قازاقستان وبلىسىندا – 388,
• اتىراۋ وبلىسىندا – 336,
• اقمولا وبلىسىندا – 329.

پاندەميا باستالعالى بەرى قازاقستاندا مىڭداعان مەدقىزمەتكەر ۆيرۋس جۇقتىرعان، 180-نەن استامى ومىردەن وتكەن. بىراق بيلىك ولاردىڭ بارىنە بىردەي وتەماقى بەرمەيدى. قىزمەتتەن تىس كەزدە جۇقتىرعانداردى سۇرىپتاپ قارايدى. ساراپشىلار تالعاۋ-تەكسەرۋ تەتىگى وتەماقىنى ازايتۋدىڭ امالىنا اينالدى دەپ سانايدى.

قۇقىقتىق تالاپ بويىنشا ناۋقاستان مەدقىزمەتكەر اۋىرعانىن دالەلدەۋگە كەمىندە 40 قۇجات جيناۋى قاجەت. جەرگىلىكتى كوميسسيالاردىڭ جۇمىسى باياۋ. قازان ايىنىڭ باسىنداعى رەسمي دەرەككە قاراعاندا، قازاقستاندا 12 830 مەديتسينا قىزمەتكەرى كوروناۆيرۋس جۇقتىرعان، ونىڭ 8333-ءى قىزمەت بارىسىندا اۋىرعان. ۇكىمەت باسشىسى اسقار ءماميننىڭ 4 قازاندا ۇسىنعان مالىمەتىنشە، قازىرگى تاڭدا ەپيدەمياعا قارسى 46 مىڭنان استام مەديتسينا قىزمەتكەرى تارتىلعان. دەنمين مەن ەڭبەكمين قىركۇيەك ايىنىڭ اياعىنا دەيىن ءوتىنىمدى تىركەۋ جانە تولەم تاعايىنداۋ جۇمىسىندا سىلبىر بولعانى ءۇشىن وتكەن اپتادا پارلامەنت دەپۋتاتتارى جانە قوعام تاراپىنان سىنعا ۇشىراعان.

"The Qazaq Times"