2016 jılı Atırauda Jer dauı kezinde alañda öz pikirin bildirip, sol kezdegi öñir äkimi Nwrlan Noğaev eşkim jazalanbaytının aytsa da 5 jılğa qamalğan Talğat Ayan (sol jaqta) men Maks Boqaev (oñ jaqta). Foto-grafika: pana-defenders.info

Qazaqstandağı sayasi şeruler men mitingterde bosatıluı talap etiletin, qwqıq qorğauşılar «sayasi twtqın» sanaytın belsendi Maks Boqaev basqa türmege jiberildi. 134 künnen keyin  jazası ayaqtalatın Boqaev azamattıq qoğamğa «moyımaytın, qayıspas azamat» retinde tanıs twlğa. 

Qazaq halqınıñ «mülgigen» sanasın silkintken Jer dauı kezinde Mahambet pen Isatay eskertkişteriniñ tübinde wlt müddesin wrandatqanı üşin bes jılğa sottalğan atıraulıq belsendi Maks Boqaev basqa abaqtığa auıstırıldı.  Aqtöbedegi KA-168/2 türmesinde otırğan onı 28 qırküyek küni Atırauğa etappen jetkizgen. Bwl jöninde Azattıqqa habarlağan belsendi Talğat Ayannıñ aytuınşa, «Boqaevtı tañerteñ arnayı vagonmen Maqat stansasına jetkizgen. Keyin Mañğışlaq - Atırau jolauşılar poezına salıp jibergen».

«Onımen söylesuge mümkindik bolmadı. Tek alıstan «Maks, qal qalay?» dep amandastıq. Endi ol eki apta karantinde boladı. Atıraudağı UG-157/9 türmesinde boladı, – deydi Talğat Ayan Azattıq radiosına bergen kommentariyinde.

Ayanmen birge Maks Boqaevtı qarsı aluğa qwqıq qorğauşılar Äsel Nwrğazieva men Dar'ya Oljağalieva bardı.

46 jastağı Maks Boqaev pen Talğat Ayan 2016 jılı Jer mitingisinen soñ «äleumettik arazdıq tudırdı», «jalğan aqparat tarattı» jäne «miting ötkizu zañdarın bwzdı» degen ayıppen bes jılğa sottalğan edi. Abaqtığa qamalğan belsendiler – Maks Boqaev pen Talğat Ayanğa qazaq qalamgerleri men azamattıq qoğam ökilderi sırttay «Halıq batırı» qoğamdıq sıylığın bergen.  Azattıq dereginşe, 2021 jıldıñ 21 aqpanında Boqaevtıñ abaqtıdağı jaza merzimi ayaqtaluı tiis.

Al 2018 jılı sot Talğat Ayannıñ türmeden merziminen bwrın bosatu turalı ötinişin qanağattandırıp, onıñ jazasın şarttı türge almastırıp, bıltır şildede onı jazadan tolıq bosattı. Maks Boqaev «qamaudan uaqıtınan bwrın şığuğa swranbaytının, özin tolıq aqtaudı talap etetinin» mälimdegen.

Qazaqstandıq qwqıq qorğauşılar Maks Boqaevtı «sayasi twtqındar» tizimine qosadı. Alayda Aqorda men Ükimet elde sayasi twtqındardıñ joq ekenin alğa tartadı.

"The Qazaq Times"