AQŞ Memlekettik departamenti jetekşisiniñ ekonomikalıq ösu, energetika jäne qorşağan ortanı qorğau jönindegi orınbasarı Keiz Kraç.

Ötken apta soñında AQŞ Memlekettik departamenti jetekşisiniñ ekonomikalıq ösu, energetika jäne qorşağan ortanı qorğau jönindegi orınbasarı Keiz Kraç (Keith Krach) Tayuanğa (Tayvan') saparlay barğan bolatın. Ol Uaşington men Beyjiñ diplomatiyalıq qatınas ornatqannan keyin Tayuanğa barğan eñ joğarı amerikalıq lauazımdı twlğa. Onıñ saparına Beyjiñ tarabı küşti qarsılıq reakciyasın tanıttı. Aytalıq, Tayuan bwğazında äskeri wşaqtarın wşırdı jäne jwma küni (18 qırküyek) Tayuan aralı jaqın mañda äskeri jattığuların da ötkizdi. Qıtaydıñ bwl äreketin AQŞ memlekettik hatşısı Maykl Pompeo ayıptağna bolatın.

Kraç Tayuan saparınan orala sala Qıtaydıñ jaña tehnologiya jabdıqtarınan bas tartuğa nasihattau üşin birden Europa elderine attandı. Ol kezekti saparınıñ maqsatın «qauipsiz jeli» jahandıq bastamasın alğa jıljıtu dep körsetken. Sapar barısında EO jetekşilermen kezdesu jäne Britaniyadan tıs Germaniya, Avstriya, Bel'giya, Portugaliya jäne Ispaniya qatarlı elderge barudı josparlağan.

Qwrama Ştattar biıl jıl basında «Qauipsiz jeli» bastamasın jariyaladı jäne älem elderin bwl bastamanı qoldauğa şaqırdı. Onda baylanıs operatorları, mobil'di qosımşalar, qoldanbalar dükeni, jelidegi saqtau bostıqtarı jäne su astı kabel'deri sekildi jelige qatıstı bes negizgi baqıttı «senimsiz» qıtaylıq tehnikalar men jaña tehnologiyalardan tazartudı nasihattaydı.

AQŞ-tıñ bwl bastaması älemde, äsirese bayırğı odaqtastarı Europa elderinde keñ qoldau tapqanı bayqaladı. Aytalıq, Wlıbritaniya, Çehiya, Pol'şa, Şveciya, Estoniya, Rumıniya, Daniya, Latviya jäne basqa da elder özderiniñ 5G jelilerinde «senimsiz» jetkizuşilerdiñ önimderin paydalanbau turalı keñesti qabıldağanı belgili. Al Franciya, Ündistan, Avstriya, Oñtüstik Koreya, Japoniya jäne Wlıbritaniyadağı iri baylanıs operatorları «Qıtay kommunistik partiyasınıñ baqılau jüyesindegi qwraldardı» qoldanudan tübegeyli bas tartıp otır. Bwlarğa qosa, Kanadaıñ üş iri telekommunikaciyalıq kompaniyası Huawei önimderin 5G jelilerinde qoldanbaytının mälimdedi.

“The Qazaq Times”