Bügingi OrtKom brifinginde Densaulıq saqtau ministrliginiñ resmi uäkili Bağdat Qojahmetovtiñ mälimetinşe, «boyınan koronavirus tabılğan, biraq basqa aurudıñ sebebinen qaytıs boldı» delingen qazaqstandıqtardıñ sanı 576-ğa jetken. 

Pandemiya bastalğalı  virus jwqqandardıñ jalpı jiını 2,5 mıñnan artıq adam (KVI+ / U07.1 – 1656, KVI- / U07.2 – 318, ilespe aurulardan – 576) qaytıs bolğan.

Qojahmetovtiñ aytuınşa, 4-11 qırküyek aralığında 20 ölim jağdayı tirkelgen. Barlığı 576 ölim jağdayına sebep bolğan diagnozdardıñ jiktelimi:

  • Tınısalu organdarınıñ auruları - 52,4%
  • Qan aynalım jüyesi auruları – 29%
  • İsik türlerinen – 4%
  • Özge potologiya aurularınan – 14,6%

«Respublikalıq elektrondıq Densaulıq saqtau ortalığınıñ derekterine säykes, qaytqandardıñ arasında keybir infekciyalıq jäne parazittik aurular, isikter, qan ağzalarınıñ auruları jäne immundıq mehanizmdi qamtitın jekelegen bwzılular, endokrindik jüye auruları jäne zat almasudıñ bwzıluı, nerv jüyesiniñ auruları, qanaynalım jüyesiniñ auruları, tınıs alu ağzalarınıñ auruları, as qorıtu ağzalarınıñ auruları, nesep-jınıs jüyesiniñ auruları, ulanu, jaraqattar jäne sırtqı sebepterdiñ basqa da saldarınıñ nozologiyaları boyınşa tirkeldi», – dep jauap berdi DenMin redakciya saualına.

Qazaqstan Ükimeti koronavirustan jäne koronaviruspen qaytıs bolğandar dep qarastırıp keledi. Säykesinşe ekinşi türinen, yağni virustı jwqtırsa da basqa aurudan qaytqandardı jalpı statistikağa qospaydı. Täuelsiz sarapşılar pikiri «joğarıda atalğan aurularğa şaldıqqan nauqastardıñ jağdayı asqınğan satıda bolmasa, psihika ne oqıs jaraqat-soqqı sebebinen qaytpasa, onda olardıñ deni koronavirustıñ qwrbanı retinde qarastırıluı tiis» degen ortaq arnağa toğısadı.

10 qırküyekke deyingi koronavirustıq infekciyamen auırğandar turalı aqparat. Foto: DenMin

Baqıt Tümenova, «Aman-saulıq» qoğamdıq qorınıñ prezidenti, KSRO densaulıq saqtau isiniñ üzdigi:

Koronavirus jürek, ökpe, qant diabeti sekildi sozılmalı aurulardı qozıdruı mümkin. Qaytıs bolğanda jüregi toqtap, tromboz boluı ıqtimal. Mümkin koronaviruspen auırmasa, qoldauşı terapiya alıp tiri jüre beruşi edi. Qaytqan adamnıñ diagnozı men ölim sebebinde baylanıs bolatını anıq. ...Virus jwqqandıqtan tromb mölşeri wlğayıp, qan wyıp jürek, ökpe ne miğa salmaq saladı. Osınıñ saldarı da äser etpeydi dey almaymız. Pnevmoniya auruın PTR-dıñ barı-joğına qaramastan klinikasına qaray koronavirustıq sipatta qarastıru qajet dep basınan beri aytıp kelemiz.

Serik Twrsın, Şveycariyadağı qazaq därigeri, medicina bilimderi boyınşa oqıtuşı-tälimger:

Qazaq «auruın jasırğan öledi» deydi. Koronvirus turalı statsitikanıñ dwrıs berilmeui tek qazaqstandıqtardı ğana emes, bizdi de oylandıradı. DDSW-nıñ belgilegen kod aqpan ayında naqtılanğan. Al Qazaqstan biligi nege tamızdan bastap engizdi. Bwğan jauap berui kerek. Qaytıs bolğan adamnıñ boyında basqa auruı bolğanına qaramastan, ağzasınan virus tabılsa, birden koronavirus sebebinen dep esepteui tiis. Öytkeni virus angiotenzin konverting receptorı arqılı denege kiredi. Ekinşi türi qan tamırları arqılı boyğa taraydı. Sondıqtan virus barlıq tinge jayılıp, eñ älsiz twsınan wstaydı. Jası ülken adamdardıñ sozılmalı auruın qozdırıp, saldarı ölimge aynalıp jatır. Bwl sözsiz koronavirus statistikasına enui tiis. Jıldıñ basınan bergi barlıq pnevmoniyanı aqökpe dep aydarlap, negizgi esepten böldi. Bwl qate qadam. Mwnı Qıtaydağı twmau mausımında örşigen pnevmoniyanı KT arqılı ajıratatın ğılımi täjiribe däleldedi.

Mıñjılqı Berdiqojaev, Qazaqstandıq joğarı sanattı neyrohirurg-däriger:

Qaterli isigi ne qan qısımı joğarı adamğa em dwrıs jasalsa, olar ömir süre berer edi. Koronavirustıñ janama äserinen qaytqanı jönindegi derekke tolıq köz jetkizu üşin öte kürdeli  zertteu – saraptama jürgizu kerek. Onı jasap jatatın eşkim joq şığar. Sondıqtan resmi mälimetke senuge mäjbürmiz. Keybir elder koronavirus basqa aurulardıñ asqınuına sebep boldı dep eseptese, basqa elder öz aldına bölek jürgizedi.

Qayırğali Köneev, nevrolog-däriger, medicina ğılımdarınıñ kandidatı:

Koronavirus infekciyası tromboz tudırğandıqtan joğarıda körsetilgen qayğılı jağdayğa alıp keletini anıq. Köptegen elderde koronavirus jwqqan adamdar oqıs jağdaydan basqa kezdiñ bärinde qwrbandardı indet sebebinen dep esepke alınadı.

"The Qazaq Times"