AQŞ Memlekettik hatşısı Mayk Pompeo jäne Aq üy basşısı Donal'd Tramp. Foto: https://cdn

Fox News telearnasına swhbat bergen AQŞ Memlekettik hatşısı Mayk Pompeo Reseymen salıstırğanda Qıtay Amerikağa ülken qauip töndiredi deydi.

Pompeoğa eki alpauıt memlekettiñ qaysısı eldiñ işki jäne sırtqı sayasatına aralasıp, qauipsizdigine nwqsan keltirui mümkin degen saual qoyıldı. Memlekettik departament basşısı: «Amerika Qwrama Ştattarı üşin şeteldik derjava retinde eñ ülken qauip – Qıtay kommunistik partiyasınan. Sebebi qazir olardıñ Qarulı Küşteri nığayuda. Olar Amerikanı basıp alğısı keledi, biraq prezident Tramp bwğan jol bermeydi», – dedi.

Särsenbide CNN telearnasında ötken bağdarlamada AQŞ-tıñ Ädilet ministri, Bas prokurorı Uil'yam Barrğa da osınday saual qoyılğan bolatın. Swhbatta resmi ökil «Amerikadağı saylauğa biıl Qıtay aralasıp, qauip tuğızuı mümkin» – dedi.

Barrğa AQŞ-tağı saylau procesterine aralasuğa tırısqan memleketter (Qıtay, Resey, Iran) turalı swraq qoyıldı. Barlau derekterin zerttegen Barr Amerikağa bastı qauip Qıtaydan dep aşıp ayttı.

Bwğan deyin AQŞ prezidenti Donal'd Tramp osı mäsele boyınşa mälimdeme jasağan bolatın. Jurnalist Şeril Atkissonğa swhbat bergen Tramp: «Men Resey üşin qauiptimin jäne Putin mwnı tüsinedi. Putinmen til tabıstıq, biraq ol meniñ saylauda jeñiske jetuimdi qalamaydı. Jaqsı baylanısta bolsaq ta, ol meniñ jeñisime qarsı. Sonımen qatar Qıtay da meniñ wtılğanımdı qalaydı», – dedi.

AQŞ barlau agenttikteri 2016 jılı ötken piezidenttik saylauda Resey saylau procesine aralastı dep ayıptağan. Osı is boyınşa iergeudi AQŞ arnayı prokurorı Robert Myuller eki jılğa juıq uaqıt boyı jürgizdi. Atap aytqanda, ol Putin men Tramp arasındağı kelissözderdi tergedi. Biraq boljamdar däleldengen joq.

Aq üy basşısı Tramp saylau nauqanı kezinde reseylik şeneuniktermen zañsız baylanıstar turalı küdikti joqqa şığarğan. Elde kezekti prezidenttik saylau biıl qaraşada ötedi.

Aqpanda 2021 jılğa arnalğan byudjet jobasında Resey men Qıtay AQŞ üşin negizgi qauipti memleket dep ataldı. Aq üy Reseyge qarsı twru üşin 700 million dollar böludi wsındı. Bwl qarajat AQŞ-tıñ Europadağı jäne Ortalıq Aziyadağı odaqtastarın qoldauğa jäne ortaq qauipsizdikti nığaytuğa jwmsaladı. Al «reseylik ügit-nasihat, jalğan aqparatpen» küresuge qosımşa 24 million dollar bölu josparlanğan.

"The Qazaq Times"