«پەنتاگون قىتاي حالىق-ازاتتىق ارمياسىنا قارسى كۇرەسۋگە دايىن». بۇنداي مالىمدەمەنى اقش  قورعانىس ءمينيسترى مارك ەسپەر جاسادى. ول بىرەر كۇن بۇرىن ەلدەگى ەڭ ىقپالدى باسىلىمنىڭ ءبىرى The Wall Street Journal-عا «پەنتاگون قىتايعا دايىن» دەگەن ماقالا جاريا ەتكەن.

اتالعان ماقالادا قىتاي حالىق-ازاتتىق ارمياسىنىڭ قاتەرى تۋرالى تالقىلاعان. سونداي-اق، قىتايدان تونەتىن قاۋىپكە قارسى كۇرەسۋدىڭ ءۇش نەگىزگى باعىتىن ۇسىنعان. ايتالىق، وداقتاستار مەن جاقىن سەرىكتەستەردى بىرىكتىرۋ; بەيجىڭنىڭ ۇركىتۋ-قورقىتۋ ارەكەتتەرىنە ورتاق قارسى تۇرۋ جانە بارلىق ەلدەردىڭ ەگەمەندىگى مەن ەركىن ءارى اشىق حالىقارالىق جۇيەنى قورعاۋ.

مارك ەسپەر ءوز ماقالاسىندا الەم جاڭا داۋىرگە قادام باسقانىن، بۇل ەركىن ءارى اشىق الەمدىك ءتارتىپ پەن بەيجىڭ ۇستانعان اۆتوكراتيا اراسىنداعى جاھاندىق باسەكەلەستىك ءداۋىرىنىڭ باستالعانىن بىلدىرەدى دەپ كورسەتتى. ەسپەردىڭ ايتۋىنشا، قىتاي جەتەكشىلەرى اسكەري ءىس-قيمىلدى ماقساتقا جەتۋدىڭ وزەكتى ءتاسىلى دەپ سانايدى. ال، ماقساتتارىنىڭ ىشىندەگى ەڭ ماڭىزدىسى – حالىقارالىق ءتارتىپتى وزگەرتۋ جانە الەمدە قابىلدانعان ەرەجەلەردى بۇزۋ ەكەنىن ايتادى.

پەنتاگون باسشىسى قىتايدىڭ بۇنداي قاۋىپتى ارەكەتتەرى اقش قورعانىس مينيسترلىگىن قىتايعا جان-جاقتى جاۋاپ قايتارۋعا جانە قورعانىس ستراتەگياسىن تەز ارادا جۇزەگە اسىرۋعا يتەرمەلەگەنىن العا تارتتى. مارك ەسپەر العا قويعان كۇرەس تاكتيكالارىندا باسىمدىققا يە بولۋدى ماڭىزدى دەپ كورسەتكەن. ايتالىق، قىتايمەن ۇزاققا سوزىلاتىن باسەكەدە باسىمدىققا جەتۋ ءۇشىن قۇراما شتاتتار تەڭىز، اۋە، قۇرىلىق جانە عارىش كۇشتەرىنە قوسا، كيبەركەڭىستىكتەگى باسەكەدە دە باسىمدىققا جەتۋى كەرەك. اتالعان سالالاردا قىتايمەن باسەكەگە تۇسە الاتىن، قىتايدى تەجەي الاتىن جانە جەڭە الاتىن قۋاتقا يە بولۋ كەرەك دەپ اتاپ كورسەتتى.

كۇرەستىڭ ەكىنشى باعىتىنا ساي، قۇراما شتاتتار ءوز وداقتاستارىمەن ىنتىماقتاستىقتى ارتتىرا تۇسەدى. وعان قوسا ءۇشىنشى باعىتتا وداقتاستارى مەن وزگە دە سەنىمدى سەرىكتەرى اراسىنداعى بايلانىستى كۇشەيتۋدى قولعا الۋى كەرەك.

ماقالاسىنىڭ سوڭىندا پەنتاگون باسشىسى بارلىق ەلدەردى قىتاي حالىق-ازاتتىق ارمياسىنىڭ قاۋپىن ازايتۋعا ورتاق اتسالىسۋعا شاقىردى. «بوستاندىقتى، ادام قۇقىقتارىن جانە ءتارتىپتى باعالايتىن ەلدەردىڭ اقش-تىڭ جاعىندا تۇرۋعا شاقىرامىن»، – دەگەن لەبىزىن دە قوستى.

“The Qazaq Times”