«Toqaev, şıq!»: Nesie raqımşılığın swrağan Dempartiyanı jasaq Aqordağa ötkizbedi. Keyinnen qabıldadı

Astanadağı Ministrlikter üyiniñ aldında sayasatker, Dempartiya lideri Janbolat Mamay bastağan top nesie amnistiyasın jürgizudi talap etip, mıñdağan qazaqstandıqtıñ hatın prezident Toqaevtıñ keñsesine, Aqordağa ötkizuge bardı. Biraq bastamaşıl topqa arnayı jasaq kedergi keltirip bögedi. Arada jartı sağat ötken soñ Prezident äkimşiligi keñsesi 78 mıñ adamnıñ elektrondı, 9,6 mıñ adamnıñ qağaz ötinişin qabıldap aldı. 

Sağat 11:00-ge josparlanğan sayasi-äleumettik şarağa tilşiler men Dempartiya jaqtastarı jinalğan.

– Bastı maqsatımız – 100 mıñğa tarta azamattıñ qolı jinalğan Qazaqstan halqınıñ nesielik amnistiya turalı arızın Aqordağa ötkizemiz. 5,5 millionğa tarta azamattıñ 4,4 trln teñge bereşegin bir retke öteuge memlekettiñ şaması jetedi. Bir ay işinde merzim beremiz. Eger şeşim bolmasa, bir aydan soñ halıqtı beybit mitingke şaqıramız. Bilik halıq talap etkende, köşege şıqqanda ğana qolğa alatın ädeti bar, – dedi Dempartiya bastamaşıl tobınıñ jetekşisi Janbolat Mamay.

Degenmen 100 mıñ adamnıñ qolı qoyılğan hattı Aqordağa bettegen toptıñ aldın ondağan äskeri bögep, köpirden de, aynalma joldan da ötkizbey qoydı.

Gruziyada, BAÄ, Oñtüstik Koreyada, Moñğoliyadağı nesielik raqımşılıq täjiriebesin alğa tarta otırıp, däl mwnday kömek pandemiya kezinde asa mañızdı, qajetti qadam dep sanaydı.

«Nesielik amnistiya jariyalau Qazaqstanda oĭlap tabılğan bağdarlama emes. Bwğan deĭin Gruziyada 600 mıñ adamnıñ 1.5 milliard dollardı qwraĭtın nesiesi keşirildi. Moñğoliya prezidenti 2020 jılı qañtar aĭında eldegi barlıq zeĭnetkerlerdiñ nesiesin keşirdi. Nesielik amnistiya Oñtüstik Koreyada, Birikken Arab Ämirlikterinde de jariyalandı. Sondıqtan, älemdik precedent bar.
Nesielik amnistiya jariyalauğa aqşa joq degen sıltauğa da biz senbeĭmiz. Sizdiñ söziñizge sensek, Wlttıq qorımızda 90 milliard dollar qarajat bar. Odan bölek, täuelsizdik jıldarında ofşorğa 140 milliard dollar audarılğan. Sol aqşanı nege qaĭtarmasqa?» deydi ol.

Şamamen sağat 11:10 ötkende äleumettik qaşıqtıqtı saqtamay, şınjır tizbek qwrıp twrğan äskerilerdiñ jolın bögeuine narazı belsendi top «Toqaev, şıq!» dep wrandastı.

Arasına arandatuşı jiberildi degen belsendi top tek «resmi uäkil kelip talap-arızdı qabıldap aluın» swrap twrğanın aytadı.

Ministrlikter üyiniñ mañında toptasqan jwrtqa sağat 11:33-te özin Prezident äkimşiliginiñ ötinişterdi qaraudı baqılau bölimi meñgeruşisiniñ orınbasarı  Qadir Daniyar Ramazanwlı dep tanıstırğan adam qwzırlı mekemege (Ministrlikter üyiniñ 15 blogına – QT) ertip äketti.

Belsendi toptıñ jeti ökili keñse qızmetkerlerine 78 mıñ azamattıñ elektrondı nwsqadağı arızı men qağaz türindegi 9600 arızdı tapsırıp jatır. Tikeley efir jürgizip twrğan Dempartiya müşesi Janbol Rahmatulla keñse törinde qazirgi memleket basşısınıñ emes, eks-prezident Nazarbaevtıñ portreti twrğanın sınğa aldı.

Aqordadan bwqaralıq nesielik anistiya jasaudı talap etken Dempartiya qwramı. Foto: Janbolat Mamaydıñ Facebook jelisindegi paraqşasınan

Janbolat Mamay eki aydan beri künine sağat 11-den 16:00-ge deyin arız qabıldağanın aytadı.

Tüski sağat 12:18-de Mamay qorıtındı sözin söyledi:

– İndettiñ qarqını aqırındap jatır dedi ğoy. Qırküyekke deyin bir ay küteyik. Talaptı orındamasa, mitingke şığamız. Halıqtıñ amanatın tapsırdıq. Talaptı orındatpay qoymaymız. Toqaev bükil halıqtıñ nesiesin bir ret keşiruge şeşim qabıldauı tiis. Soñına deyin küresemiz, – dedi.

Mausım ayı bastalğalı beri Janbolat Mamay äleumettik jeliler men internet arqılı koronaviruspen qatar kelgen ekonomikalıq auır dağdarıstı bastan keşirip jatqan eldi nesie raqımşılığın talap etuge şaqırıp keledi. Demokratiyalıq partiya qwrudı közdeytin top tamızdıñ basında «Estitin memleket», «Halıq ünine qwlaq asatın memleket» twjırımdamasımen sayasat jürgizuge uäde etken prezident Qasım-Jomart Toqaevtıñ atına aşıq hat jazıp, aşıq derekközderde jariyalağan edi.

"The Qazaq Times"