Belarus' pen Resey qarım-qatınası uşığıp ketti. Minsk tarabı öz elinde wstalğan reseylik azamattardı "ÇVK Vagner", yağni "Vagnerd jekelik äskeri kompaniyasınıñ" jaldamalı äskerleri dep mälimdegen. Al, Mäskeu äzirşe sabırlı keyip tanıtıp, saylau qarsañında bolıp jatqan bwl jağdaylar odaqtas eldiñ işki mäselesi degen mämilede twr.

Belarus' elindegi oppoziciya bastağan narazılıq saylau jaqındağan sayın küşeydi. El işiniñ jäne şetelderdiñ basılımdarı kezekti oppoziciyanıñ biriguin el tarihındağı eñ auqımdı oqiğalar qatarında atap jatır. Eñ qızığı osığan deyin oppoziciya prezident Lukaşenkonıñ biligin Mäskeudiñ şılauındağı "Reseymen astasqan bilik" dep ayıptauşı edi. Qazir jağday kerine aynalıp, prezident Lukaşenko oppoziciyanıñ artında Mäskeu twrğanın aytıp "baybalam saluda".

"Reseylik jaldamalı äskerler"

28 şildede Belarus' qauipsizdik küşteri Minsk qalasınıñ şetindegi demalıs ornnınan 32 adamdı qolğa aldı. Tağı bir reseylikti eldiñ oñtüstiginen wstadı. Eldegi BAQ qwqıq qorğau wyımdarına silteme jasay otırıp, bwl wstalğandar Reseyge tän "ÇVK Vagner"-diñ jaldamalı sarbazdarı" dep mälimdedi. Habarlarda tağı eldegi prezident saylauğa oray 200-den asa jaldamalı äskerlerdiñ elge kirgeni aytıladı.

Belarus' SİM tarabı olardıñ köbi Ukrainanıñ şığısında soğısqan jaldamalı sarbazdar dep körsetti. Ukraina 28 adamdı ötkerip barudi talap etken.

Orıs biligi bwl iske bayıptılıq tanıtqanday boldı. Qauipsizdik keñesiniñ otırısında RF prezidenti bwl azamattardı negizssiz wstalğan jäne köp ötpey bosatıladı dep ümittenetinin jetkizdi.

Saylau qarsañındağı Belarus'

9 tamızda Belarus' jwrtı el tarihında altınşı retki prezident saylauın ötkizbek. Reseydi saylauğa aralastı dep ayıptau isteri bwğan deyin de bolğan. Al, bwl jolı Minsk biligi resmi mälimdeme jasap, Resey saylauğa aralasıp qoğamdıq twraqsızdıq jarattı dep şıqtı. Birqatar ekspertter Lukaşenko sırtqı küşterdi ayta otırıp, saylauda elektorattıñ qoldauına ie boludı közdeytinin aytadı.

"Belgazprom banktıñ quırşaqtarı"

Minsk tarabınıñ mwnıday mämilesi Belgazprom banktıñ jetekşisi Viktor Babariko saylauğa qatısatının bildirgennen keyin bastaldı. Lukaşenko biligi Babariko jaqtastarın "Gazpromnıñ quırşaqtarı" dep atap keledi. Atalğan banktıñ 100 payız akciyası reseylik "Gazpromğa" jäne Gazprom bankke qarastı. Belarus'tıñ Resey gazına qarızı 273 mln AQŞ dollarına deyin ösken. Oğan qosa eldiñ sırtqı qarızı jartı jılda 17, 5 payızğa ösip, 52.6 Belarus' rubln qwradı. Resey bir jıldan beri qarızın keşirgen joq jäne järdem de wsınbadı.

Reseymen iligi bar dep ayıptalğan Babariko 18 mausımda "aqşa jımqıru", "salıqtan jaltaru" jäne "para alu" degen ayıptarmen qamalğan. Oğan qosa onıñ eñ negizgi jaqtastarı da wstaldı.

Lukaşenko men Putinniñ arasına sızat tüsken be?

Esteriñizde bolsa, bwdan eki jıl bwrın Putin men Lukaşenko sözge kelispey qalıp edi. Sol kezde Resey gazınıñ qımbat ekenine ökpeli Lukaşenko Kreml' qojasınıñ şamına tietin sözder aytqanı bar. Biraq, keyingi bir baspasöz jiınında Lukaşenko Putinnen keşirim swrap, qarım-qatınastı retke keltirgenderin aytqan. Biraq, bwl tolıqtay şındıq bolmasa kerek.

Belarus' basılımdarınıñ jazuınşa bıltırdan beri Lukaşenko Putinmen qarım-qatınasın retke keltiruge köp küş salğan. Alayda, odan nätije bolmağan küyi Belarus'tıñ kezekti prezident saylauı kelip ülgirgen.

Lukaşenkonıñ saylau strategiyası

Belarus' biligin wzaq uaqıt şeñgelinde wstağan Lukaşenko bwl jolı Mäskeumen aradağı kirbeñdikti de öz paydasına şeşip ketkisi keletini bayqaladı. Aytalıq, eldegi bilikti reseyşil dep ayıptaytın köpşilik jwrttıñ köñilin tabu üşin sırtqı küşterdi basa aytıp jatır. Bwğan qosa saylauşılarğa "men bolmasam Reseydiñ agressiyası kütip twr" degen oydı köldeneñ tartuda.

Soğan qaramasttan eldegi oppoziciya birigip, auqımdı narazılıq şaraların ötkizdi. Lukaşenko biligi de qarap qalmay elde ereuilge jol bermeytinin körsetip, Minskide äskerilerdiñ qatısuımen jattığular ötkizdi. Bwl jağdaylardı saraptay otırıp basım köp sarapşılar "Lukaşenko eki ottıñ ortasında qaldı" dep bağalaydı.

"The Qazaq Times"