Densaulıq saqtau ministri Aleksey Coy şilde bastalğalı 135 mıñ adam pnevmoniyağa şaldığıp, 1555 adam qaytıs bolğanın mälimdedi. Bas däriger tamız ayınan bastap pnevmoniya jäne koronavirus auruınıñ statistikasın birge esepteuge boladı.  

Bügin, 17 şilde Ortalıq kommunikaciyalar qızmeti  alañında DDSW Europalıq keñsesiniñ tötenşe jağdaylar jönindegi aymaqtıq direktorı doktor Dorit Niczannıñ jäne Europalıq aymaqtıq byurosınıñ direktorı doktor Hans Klugeniñ onlayn baylanısı arqılı ötken brifingte ministr Coy 1 qañtardan beri (15 şildege deyin – QT)  234 187 qazaqstandıqtan pnevmoniya anıqtalğanın mälimdedi. Bas därigerdiñ dereginşe,  biılğa indetten 3327 adam qaytıs bolğan.

Bwğan deyin 2 şilde küni Aleksey Coy alğaşqı jartı jıldıqta (qañtar men mausım – QT) 98 546 pnevmoniya jağdayı, onıñ 1772-si ölimge äkep soqtırğanın habarlağan edi. Demek bügingi derekke süyensek, şilde ayınıñ alğaşqı jartısınıñ özinde pnevmoniyamen auırğan 135 641 adamnıñ 1555-i qaytıs bolğanın köruge boladı. Sonda künine 9 mıñday adam tirkelgen.

Brifingte pnevmoniya turalı tıñ derekten bölek ministr kelesi aydan, tamızdan bastap COVID-19 keysteri men simptomı virusqa wqsaytın pnevmoniyanıñ statistikasın qosa esepteytinin jariyaladı. Biraq osı uaqıtqa deyin tirkelgen 234 mıñnan astam (onıñ işinde 135 mıñı şildede tirkelgen – QT) adamnıñ qaysında koronavirus belgisi bolğanın qalay anıqtalatını äzirge belgisiz. Degenmen sarapşılar bir aydıñ özinde kürt ösken 135 mıñ jağdaydıñ tügelderligi koronavirusqa jatadı dep sanaydı. Resmi sanaqtağı 66 895 keyske qosımşa şildedegi 135 641 pnevmoniyanı, mwnıñ tamızğa deyin ösetinin eskersek, virus jwqtırğandar sanı keminde 203 mıñğa şığadı.

Jaz bastalğalı beri Qazaqstanda Sars-CoV-2 virusımen qatar koronavirustıq pnevmoniya örşi tüsti. Statistikanı manipulyaciyaladı degen aşı sınğa wşırağan densaulıq saqtau ministrligi eki aurudı qosa esepteudi prezident Toqaevtıñ «sanaqtı birizdendiru» jönindegi tapsırmasınan keyin birden qolğa aldı.

"The Qazaq Times"