دەنساۋلىق ساقتاۋ ءمينيسترى الەكسەي تسوي شىلدە باستالعالى 135 مىڭ ادام پنەۆمونياعا شالدىعىپ، 1555 ادام قايتىس بولعانىن مالىمدەدى. باس دارىگەر تامىز ايىنان باستاپ پنەۆمونيا جانە كوروناۆيرۋس اۋرۋىنىڭ ستاتيستيكاسىن بىرگە ەسەپتەۋگە بولادى.  

بۇگىن، 17 شىلدە ورتالىق كوممۋنيكاتسيالار قىزمەتى  الاڭىندا ددسۇ ەۋروپالىق كەڭسەسىنىڭ توتەنشە جاعدايلار جونىندەگى ايماقتىق ديرەكتورى دوكتور دوريت نيتسزاننىڭ جانە ەۋروپالىق ايماقتىق بيۋروسىنىڭ ديرەكتورى دوكتور حانس كلۋگەنىڭ ونلاين بايلانىسى ارقىلى وتكەن بريفينگتە مينيستر تسوي 1 قاڭتاردان بەرى (15 شىلدەگە دەيىن – QT)  234 187 قازاقستاندىقتان پنەۆمونيا انىقتالعانىن مالىمدەدى. باس دارىگەردىڭ دەرەگىنشە،  بيىلعا ىندەتتەن 3327 ادام قايتىس بولعان.

بۇعان دەيىن 2 شىلدە كۇنى الەكسەي تسوي العاشقى جارتى جىلدىقتا (قاڭتار مەن ماۋسىم – QT) 98 546 پنەۆمونيا جاعدايى، ونىڭ 1772-ءسى ولىمگە اكەپ سوقتىرعانىن حابارلاعان ەدى. دەمەك بۇگىنگى دەرەككە سۇيەنسەك، شىلدە ايىنىڭ العاشقى جارتىسىنىڭ وزىندە پنەۆمونيامەن اۋىرعان 135 641 ادامنىڭ 1555-ءى قايتىس بولعانىن كورۋگە بولادى. سوندا كۇنىنە 9 مىڭداي ادام تىركەلگەن.

بريفينگتە پنەۆمونيا تۋرالى تىڭ دەرەكتەن بولەك مينيستر كەلەسى ايدان، تامىزدان باستاپ COVID-19 كەيستەرى مەن سيمپتومى ۆيرۋسقا ۇقسايتىن پنەۆمونيانىڭ ستاتيستيكاسىن قوسا ەسەپتەيتىنىن جاريالادى. بىراق وسى ۋاقىتقا دەيىن تىركەلگەن 234 مىڭنان استام (ونىڭ ىشىندە 135 مىڭى شىلدەدە تىركەلگەن – QT) ادامنىڭ قايسىندا كوروناۆيرۋس بەلگىسى بولعانىن قالاي انىقتالاتىنى ازىرگە بەلگىسىز. دەگەنمەن ساراپشىلار ءبىر ايدىڭ وزىندە كۇرت وسكەن 135 مىڭ جاعدايدىڭ تۇگەلدەرلىگى كوروناۆيرۋسقا جاتادى دەپ سانايدى. رەسمي ساناقتاعى 66 895 كەيسكە قوسىمشا شىلدەدەگى 135 641 پنەۆمونيانى، مۇنىڭ تامىزعا دەيىن وسەتىنىن ەسكەرسەك، ۆيرۋس جۇقتىرعاندار سانى كەمىندە 203 مىڭعا شىعادى.

جاز باستالعالى بەرى قازاقستاندا Sars-CoV-2 ۆيرۋسىمەن قاتار كوروناۆيرۋستىق پنەۆمونيا ءورشي ءتۇستى. ستاتيستيكانى مانيپۋلياتسيالادى دەگەن اششى سىنعا ۇشىراعان دەنساۋلىق ساقتاۋ مينيسترلىگى ەكى اۋرۋدى قوسا ەسەپتەۋدى پرەزيدەنت توقاەۆتىڭ «ساناقتى بىرىزدەندىرۋ» جونىندەگى تاپسىرماسىنان كەيىن بىردەن قولعا الدى.

"The Qazaq Times"