Tramp qazirgi ekonomikalıq jağdaylarğa baylanıstı mälimdeme jasadı. Foto: VOA

AQŞ prezidenti Donal'd Tramp düysenbi küni jasağan mälimdemesinde, jaña koronavirustan ekonomikalıq twrğıda zardap şekken kompaniyalarğa qoldau körsetuge uäde etti.

Mwnay öndiruşi elder arasındağı kelispeuşilik jäne jaña indet qaupi qorlar bağasınıñ qwldırauına äkelip soqtı. Osığan baylanıstı AQŞ prezidenti öziniñ ekonomika jönindegi keñesşilerimen jäne qarjı ministrimen arnayı kezdesu ötkizdi. Ekonomikalıq keñesşileri oğan indet jağdayınan keyin sauda-ekonomikalıq twrğıda zardap şekken käsiporındarğa ükimettik qoldau körsetu joldarın wsındı.

Osı jinalıstan keyin prezident Tramppen birge vice-prezidenti Mayk Pens, AQŞ qarjı ministri Mnuçin, densaulıq saqtau ministri Azar jäne densaulıq saqtau salasınıñ keybir qızmetkerleri Aq üydegi baspasöz ortalığında jurnalistermen kezdesti. AQŞ qarjı ministri jiın kezinde: «Bir jıldan keyin ekonomikada jaqsı jağday ornaydı», – dep mälimdegen.

Prezident Tramp seysenbide (Uaşington jergilikti uaqıtımen) Kongress basşılarımen kezdesude Aq üydegi jinalıstağı wsınıstar boyınşa ükimettik qoldau mäselesin keñirek talqılamaq. Äsirese, kongresmendermen jalaqığa salınatın salıqtı qısqartu şarasın jiti äñgimege saladı.

AQŞ-tıñ turizm salası jılına el qaltasına 1,6 trillion dollar tabıs äkeledi. Jaña täj virusına baylanıstı AQŞ-tıñ turizm salası aur zardap şegedi dep kütilude. Osığan qarağanda, Tramp äkimşiligi ükimettik qoldauğa alatın salalar qatarına turizm salası da kirui mümkin. Tramp oğan qosa azamattıq aviaciya, teñiz tasımal kompaniyaların da qoldauğa alatının jetkizdi.

Mwnay bağasınıñ arzandauına baylanıstı AQŞ ükimeti alañdap otırmağanı bayqaladı. Tramp sözinde mwnay bağasınıñ tömendeui twtınuşılar üşin paydalı ekenin, aytalıq janar jağar maydıñ arzandaytının ayttı.

“The Qazaq Times”