مۇناي باعاسىنىڭ ارزانداۋى ترامپتى الاڭداتىپ وتىرعان جوق

اقش پرەزيدەنتى دونالد ترامپ دۇيسەنبى كۇنى جاساعان مالىمدەمەسىندە، جاڭا كوروناۆيرۋستان ەكونوميكالىق تۇرعىدا زارداپ شەككەن كومپانيالارعا قولداۋ كورسەتۋگە ۋادە ەتتى.

مۇناي ءوندىرۋشى ەلدەر اراسىنداعى كەلىسپەۋشىلىك جانە جاڭا ىندەت قاۋپى قورلار باعاسىنىڭ قۇلدىراۋىنا اكەلىپ سوقتى. وسىعان بايلانىستى اقش پرەزيدەنتى ءوزىنىڭ ەكونوميكا جونىندەگى كەڭەسشىلەرىمەن جانە قارجى مينيسترىمەن ارنايى كەزدەسۋ وتكىزدى. ەكونوميكالىق كەڭەسشىلەرى وعان ىندەت جاعدايىنان كەيىن ساۋدا-ەكونوميكالىق تۇرعىدا زارداپ شەككەن كاسىپورىندارعا ۇكىمەتتىك قولداۋ كورسەتۋ جولدارىن ۇسىندى.

وسى جينالىستان كەيىن پرەزيدەنت ترامپپەن بىرگە ۆيتسە-پرەزيدەنتى مايك پەنس، اقش قارجى ءمينيسترى منۋچين، دەنساۋلىق ساقتاۋ ءمينيسترى ازار جانە دەنساۋلىق ساقتاۋ سالاسىنىڭ كەيبىر قىزمەتكەرلەرى اق ۇيدەگى ءباسپاسوز ورتالىعىندا جۋرناليستەرمەن كەزدەستى. اقش قارجى ءمينيسترى جيىن كەزىندە: «ءبىر جىلدان كەيىن ەكونوميكادا جاقسى جاعداي ورنايدى»، – دەپ مالىمدەگەن.

پرەزيدەنت ترامپ سەيسەنبىدە (ۋاشينگتون جەرگىلىكتى ۋاقىتىمەن) كونگرەسس باسشىلارىمەن كەزدەسۋدە اق ۇيدەگى جينالىستاعى ۇسىنىستار بويىنشا ۇكىمەتتىك قولداۋ ماسەلەسىن كەڭىرەك تالقىلاماق. اسىرەسە، كونگرەسمەندەرمەن جالاقىعا سالىناتىن سالىقتى قىسقارتۋ شاراسىن ءجىتى اڭگىمەگە سالادى.

اقش-تىڭ تۋريزم سالاسى جىلىنا ەل قالتاسىنا 1,6 تريلليون دوللار تابىس اكەلەدى. جاڭا ءتاج ۆيرۋسىنا بايلانىستى اقش-تىڭ تۋريزم سالاسى اۋر زارداپ شەگەدى دەپ كۇتىلۋدە. وسىعان قاراعاندا، ترامپ اكىمشىلىگى ۇكىمەتتىك قولداۋعا الاتىن سالالار قاتارىنا تۋريزم سالاسى دا كىرۋى مۇمكىن. ترامپ وعان قوسا ازاماتتىق اۆياتسيا، تەڭىز تاسىمال كومپانيالارىن دا قولداۋعا الاتىنىن جەتكىزدى.

مۇناي باعاسىنىڭ ارزانداۋىنا بايلانىستى اقش ۇكىمەتى الاڭداپ وتىرماعانى بايقالادى. ترامپ سوزىندە مۇناي باعاسىنىڭ تومەندەۋى تۇتىنۋشىلار ءۇشىن پايدالى ەكەنىن، ايتالىق جانار جاعار مايدىڭ ارزاندايتىنىن ايتتى.

“The Qazaq Times”