AQŞ memlekettik hatşısı Mayk Pompeo kezekti mälimdemesinde Qıtay ükimetin öz elinde jwmıs isteytin şeteldik BAQ-qa ädilettilikpen qarauğa şaqırdı.

AQŞ memlekettik hatşısı beysenbi küni ötken baspasöz jiınında AQŞ-tağı qıtaylıq media jurnalisteriniñ sanın qısqartu turalı şeşimdi jöninde tüsinik berdi. «Biz ötken aptada AQŞ-tağı Qıtaydıñ memlekettik ügit-nasihat agenttikteriniñ beseuinde qızmetker sanınıñ belgilengen şekten asıp ketkenin anıqtadıq. Biz bwl äreketti prezident Tramptıñ Qıtaymen teñ qwqılı qarım-qatınas ornatu missiyasın orındau üşin jasadıq», – dedi Pompeo.

Pompeo sonday-aq, Beyjiñge qarata: «Biz Beyjiñdi AQŞ-tağı jäne öz elindegi şeteldik BAQ-qa ädilettilikpen qaraytın boladı dep ümittenemiz. Qıtay kompartiyası täuelsiz halıqaralıq jurnalisterdiñ qwqıqtarın şektep, qatañ baqılau ornatıp, qısım körsetu nemese qorqıtu şaraların engizip otır. Biz özara tüsinistikke qol jetkizu üşin öz şaramızdı qoldanamız», – dedi.

Reuters agenttiginiñ habarlauınşa, Tramp äkimşiligi osı aptada eldegi qıtaylıq aqparat qwraldarınıñ sanın şekteu turalı şeşim şığardı. Bwl Tramp ükimetiniñ Qıtaydağı täuelsiz aqparat qwraldarına qısım körsetu äreketterine jauap retinde jasalğan. Habarda aytıluınşa, qazir Qıtaydağı söz bostandığınıñ deñgeyi bwdan on jıl bwrınğımen salıstırğanda älde qayda naşarlap ketken.

AQŞ memlekettik hatşısı 5 naurızdağı mälimdemesinde: «Täuelsiz aqparat qwraldarı jemqorlıq äreketterdi äşkerelep, jwrtşılıqtıñ aqiqattı aşuına mümkindik beredi. Bwdan bwrın aytqanımızday, aqparat cenzurası ölimge äkelui mümkin. Biz Qıtay Kommunistik partiyasın baspasöz bostandığın qwrmetteu jönindegi mindettemelerin tez arada orındauğa şaqıramız», – dedi.

“The Qazaq Times”