Mwhtar Jäkişev. Foto: aşıq derekköz

Bügin Semey qalasınıñ №2 sotı Mwhtar Jäkişevtiñ appelyaciyalıq şağımın qanağattandırdı. 

3 naurız Semey qalalıq sotınıñ sud'yası izolyatordan tikeley efir arqılı baylanısqan Mwhtar Jäkişevtiñ sozılmalı isi turalı ükim şığardı. Sot otırısına respulikanıñ är aymağınan kelgen jüzge juıq belsendi qatıstı. №2 sottıñ sud'yası Janat Äbenova:

– Mwhtar Jäkişev 3 jıl 2 ay 17 kün bwrın merziminen erte bosatılsın. Meken-jayı boyınşa bosatılğan künnen bastap 5 kün işinde işki ister organına tirkelui mindetti. Jazbaşa rwqsatsız meken-jayın özgertpeui tiis. Tolıq uaqıtı ötelgenşe elden tıs aymaqqa şığuğa tıyım salınadı, – dedi.

Jinalğandar quanıştan közine jas alıp, basqa da sayasi twtqındardı bosatuın talap etudi küşeytuge kelisti. Sarapşılar 2023 jıldıñ 20 mamırında bosatıluı tiis Jäkişevtiñ törtinşi appelyaciyalıq şağımın qanağattandıruı - azamattıq qoğam talabınıñ jemisi dese, tağı biri «Toqaevtıñ el aldındağı wpayın tügendeu» ädisi dep sanaydı. Sotqa Aqtau, Semey, Şımkent, Arıs, Almatı, Oral t.b. qalalarınan qoldauşıları keldi.

Bwğan deyin 1998-2009 jıldar aralığında «Qazatomönerkäsip» wlttıq kompaniyasın on jılday basqarğan Mwhtar Jäkişev 2010 jıldardıñ basında eki qılmıstıq is boyınşa 14 jılğa sottalğan bolatın.  Onıñ wzaq jılğa sottaluın sarapşılar ärtürli twjırdı: biri 2000 jıldarı onıñ eks-bankir Mwhtar Äblyazovqa araşa bolğanın aytsa, endi biri onıñ uran öndirisinde Reseymen baqtalas boluın alğa tartadı.

2015 jılı 6 qaraşa BWW-nıñ Adam qwqıqtarı komiteti Qazaqstandı «Azamattıq jäne sayasi qwqıq turalı halıqaralıq pakti» boyınşa, 2018 jılı 15 naurızda Ortalıq Aziyadağı Adam qwqıqtarı qauımdastığı, tağı özge de qwqıq qorğau wyımdarı onıñ negizsiz sottalğanın aytıp, bilikten onı dereu bosatuın talap etken. Soñğı birneşe jılda intellektual otbasıdan şıqqan Jäkişevti kezindegi «atom önerkäsibin damıtqan, keyin Resey kompaniyası qol astına alu üşin jasalğan sayasi quğın» dep sanaytın azamattıq qoğam ökilderi piket-miting türinde jii narazılıq akciyasın ötkizip keledi. Dese de Qazaqstan sotı bwl talaptarğa moyın bwrmap edi. 2018 jıldıñ 28 qaraşasında merziminiñ jartısınan köbin öteuine  baylanıstı birinşi ret tüsirgen appelyaciyalıq arızın Semeydiñ №2 sotı, al bıltır 24 şilde de atalğan sot, 10 qırküyekte Öskemendegi oblıstıq sot qatarınan üş märte qanağantandırmay tastağan.

2018 jılı mamırda medicinalıq komissiya qorıtındısı boyınşa, twtqındağı Mwhtar Jäkişevke üşinşi toptağı mügedektik diagnozı qoyıldı. Onıñ tört qızı men wlı büginde erjetip ülgergen.

Prizident Toqaev otandıq BAQ-qa bergen swhbatında Jäkişev isi turalı «Bwl tek sottıñ qwzıretindegi mäsele. Men, ärine, Jäkişevtiñ densaulığına baylanıstı birneşe ret merziminen bwrın şarttı türde bosatu turalı ötiniş bergenin bilemin. 3 naurızda sot otırısı ötedi. Sottıñ şeşimin küteyik, onıñ ädil bolatınına senimdimin», – degen edi.

"The Qazaq Times"