سەمەي سوتى مۇحتار جاكىشەۆتى شارتتى تۇردە بوساتتى

بۇگىن سەمەي قالاسىنىڭ №2 سوتى مۇحتار جاكىشەۆتىڭ اپپەلياتسيالىق شاعىمىن قاناعاتتاندىردى. 

3 ناۋرىز سەمەي قالالىق سوتىنىڭ سۋدياسى يزولياتوردان تىكەلەي ەفير ارقىلى بايلانىسقان مۇحتار جاكىشەۆتىڭ سوزىلمالى ءىسى تۋرالى ۇكىم شىعاردى. سوت وتىرىسىنا رەسپۋليكانىڭ ءار ايماعىنان كەلگەن جۇزگە جۋىق بەلسەندى قاتىستى. №2 سوتتىڭ سۋدياسى جانات ابەنوۆا:

– مۇحتار جاكىشەۆ 3 جىل 2 اي 17 كۇن بۇرىن مەرزىمىنەن ەرتە بوساتىلسىن. مەكەن-جايى بويىنشا بوساتىلعان كۇننەن باستاپ 5 كۇن ىشىندە ىشكى ىستەر ورگانىنا تىركەلۋى مىندەتتى. جازباشا رۇقساتسىز مەكەن-جايىن وزگەرتپەۋى ءتيىس. تولىق ۋاقىتى وتەلگەنشە ەلدەن تىس ايماققا شىعۋعا تىيىم سالىنادى، – دەدى.

جينالعاندار قۋانىشتان كوزىنە جاس الىپ، باسقا دا ساياسي تۇتقىنداردى بوساتۋىن تالاپ ەتۋدى كۇشەيتۋگە كەلىستى. ساراپشىلار 2023 جىلدىڭ 20 مامىرىندا بوساتىلۋى ءتيىس جاكىشەۆتىڭ ءتورتىنشى اپپەلياتسيالىق شاعىمىن قاناعاتتاندىرۋى - ازاماتتىق قوعام تالابىنىڭ جەمىسى دەسە، تاعى ءبىرى «توقاەۆتىڭ ەل الدىنداعى ۇپايىن تۇگەندەۋ» ءادىسى دەپ سانايدى. سوتقا اقتاۋ، سەمەي، شىمكەنت، ارىس، الماتى، ورال ت.ب. قالالارىنان قولداۋشىلارى كەلدى.

بۇعان دەيىن 1998-2009 جىلدار ارالىعىندا «قازاتومونەركاسىپ» ۇلتتىق كومپانياسىن ون جىلداي باسقارعان مۇحتار جاكىشەۆ 2010 جىلداردىڭ باسىندا ەكى قىلمىستىق ءىس بويىنشا 14 جىلعا سوتتالعان بولاتىن.  ونىڭ ۇزاق جىلعا سوتتالۋىن ساراپشىلار ءارتۇرلى تۇجىردى: ءبىرى 2000 جىلدارى ونىڭ ەكس-بانكير مۇحتار ابليازوۆقا اراشا بولعانىن ايتسا، ەندى ءبىرى ونىڭ ۋران وندىرىسىندە رەسەيمەن باقتالاس بولۋىن العا تارتادى.

2015 جىلى 6 قاراشا بۇۇ-نىڭ ادام قۇقىقتارى كوميتەتى قازاقستاندى «ازاماتتىق جانە ساياسي قۇقىق تۋرالى حالىقارالىق پاكتى» بويىنشا، 2018 جىلى 15 ناۋرىزدا ورتالىق ازياداعى ادام قۇقىقتارى قاۋىمداستىعى، تاعى وزگە دە قۇقىق قورعاۋ ۇيىمدارى ونىڭ نەگىزسىز سوتتالعانىن ايتىپ، بيلىكتەن ونى دەرەۋ بوساتۋىن تالاپ ەتكەن. سوڭعى بىرنەشە جىلدا ينتەللەكتۋال وتباسىدان شىققان جاكىشەۆتى كەزىندەگى «اتوم ونەركاسىبىن دامىتقان، كەيىن رەسەي كومپانياسى قول استىنا الۋ ءۇشىن جاسالعان ساياسي قۋعىن» دەپ سانايتىن ازاماتتىق قوعام وكىلدەرى پيكەت-ميتينگ تۇرىندە ءجيى نارازىلىق اكتسياسىن وتكىزىپ كەلەدى. دەسە دە قازاقستان سوتى بۇل تالاپتارعا مويىن بۇرماپ ەدى. 2018 جىلدىڭ 28 قاراشاسىندا مەرزىمىنىڭ جارتىسىنان كوبىن وتەۋىنە  بايلانىستى ءبىرىنشى رەت تۇسىرگەن اپپەلياتسيالىق ارىزىن سەمەيدىڭ №2 سوتى، ال بىلتىر 24 شىلدە دە اتالعان سوت، 10 قىركۇيەكتە وسكەمەندەگى وبلىستىق سوت قاتارىنان ءۇش مارتە قاناعانتاندىرماي تاستاعان.

2018 جىلى مامىردا مەديتسينالىق كوميسسيا قورىتىندىسى بويىنشا، تۇتقىنداعى مۇحتار جاكىشەۆكە ءۇشىنشى توپتاعى مۇگەدەكتىك دياگنوزى قويىلدى. ونىڭ ءتورت قىزى مەن ۇلى بۇگىندە ەرجەتىپ ۇلگەرگەن.

پريزيدەنت توقاەۆ وتاندىق باق-قا بەرگەن سۇحباتىندا جاكىشەۆ ءىسى تۋرالى «بۇل تەك سوتتىڭ قۇزىرەتىندەگى ماسەلە. مەن، ارينە، جاكىشەۆتىڭ دەنساۋلىعىنا بايلانىستى بىرنەشە رەت مەرزىمىنەن بۇرىن شارتتى تۇردە بوساتۋ تۋرالى ءوتىنىش بەرگەنىن بىلەمىن. 3 ناۋرىزدا سوت وتىرىسى وتەدى. سوتتىڭ شەشىمىن كۇتەيىك، ونىڭ ءادىل بولاتىنىنا سەنىمدىمىن», – دەگەن ەدى.

"The Qazaq Times"