Tramp Ündistannan attanar aldında. Foto: VOA7

Tramp pen onıñ prezident äkimşiligi Auğanstandağı «Taliban» wyımımen beybit kelisimge keluge jaqın twrğanın jetkizdi. Sonday-aq, AQŞ tarabı täliptermen kelisken «Auğanstandağı zorlıq-zombılıqtı azaytu» dep atalatın uaqıtşa atıstı toqtatu şarttı merzimi qazirge deyin «jaqsı orındalıp jatır» dep bağalaydı.

AQŞ prezidenti Donal'd Tramp Ündistandağı resmi saparınıñ soñında da Auğanstan mäselesine toqtaldı. Ol Auğanstan beybitşiligin jan-jaqtı qoldaytının, bwl jaña qadamdar Jaña-Deli üşin de «quanarlıq» is ekenin ayttı. Täliptermen aradağı qol jetkizgen kelisimder turalı ayta kelip, prezident Tramp: «Biz jaqın twrmız, ne bolatının köremiz», – dedi.

29 aqpanda taraptar Katardıñ Doha qalasında qaytalay kezdesedi. Oğan deyin taraptar oq atıspau kelisimin saqtasa soñğı beybitşilik kelisimine qol qoyıladı. Bwl kelisim AQŞ-tıñ 13 mıñnan astam äskeriniñ Auğanstannan şığarıluına alıp keledi degen mälimetter de bar. Osılayşa, AQŞ öziniñ Auğanstandağı soğısın toqtatqan bolıp körinbek.

AQŞ täliptermen 18 ay boyı kelissöz jürgizdi. Katar eki tarapqa kelissöz üstelin äzirlep berdi. Bwl kelisim mazmwndarında AQŞ-pen odaqtas şeteldik küşterdiñ Auğanstannan şeginui turalı da tarmaqtardıñ bar ekenin Katar aqparat qwraldarında jazılıp jatır. Al, endi AQŞ äskeriniñ tolıq şeginetini älde 8600 adamğa qısqaruı turalı soñğı şeşim şıqqan joq. Sonday-aq, kelisimge say tälipter terrorizmge qarsı küresuge mindet almaq. Bwl da bolsa kelisimniñ nazar audararlıq tarmaqtarınıñ biri. Kelisim Auğanstannıñ işki dialogına da oñ ıqpal jasaydı degen boljamdar da bar.

Täliptermen uaqıtşa atıstı toqtatu kelisimi atqarılıp jatqan twsta, AQŞ äskeri küşter eldegi özderin «Islam memleketi» terrorlıq tobına qarsı äue soqqıların jasağan.

Auğanstanda 19 jılğa jalğasqan soğısı kezinde AQŞ 1 trillion dollar köleminde şığınğa wşıradı jäne auğan jerinde 2400-ge juıq jauıngeri qaza taptı.

“The Qazaq Times”