اتىس توقتاتۋ شارتتى مەرزىمى اياقتاۋ الدىندا: اقش پەن تالىپتەر كەلىسىمگە كەلە مە؟

ترامپ پەن ونىڭ پرەزيدەنت اكىمشىلىگى اۋعانستانداعى «تاليبان» ۇيىمىمەن بەيبىت كەلىسىمگە كەلۋگە جاقىن تۇرعانىن جەتكىزدى. سونداي-اق، اقش تارابى تالىپتەرمەن كەلىسكەن «اۋعانستانداعى زورلىق-زومبىلىقتى ازايتۋ» دەپ اتالاتىن ۋاقىتشا اتىستى توقتاتۋ شارتتى مەرزىمى قازىرگە دەيىن «جاقسى ورىندالىپ جاتىر» دەپ باعالايدى.

اقش پرەزيدەنتى دونالد ترامپ ۇندىستانداعى رەسمي ساپارىنىڭ سوڭىندا دا اۋعانستان ماسەلەسىنە توقتالدى. ول اۋعانستان بەيبىتشىلىگىن جان-جاقتى قولدايتىنىن، بۇل جاڭا قادامدار جاڭا-دەلي ءۇشىن دە «قۋانارلىق» ءىس ەكەنىن ايتتى. تالىپتەرمەن اراداعى قول جەتكىزگەن كەلىسىمدەر تۋرالى ايتا كەلىپ، پرەزيدەنت ترامپ: «ءبىز جاقىن تۇرمىز، نە بولاتىنىن كورەمىز»، – دەدى.

29 اقپاندا تاراپتار كاتاردىڭ دوحا قالاسىندا قايتالاي كەزدەسەدى. وعان دەيىن تاراپتار وق اتىسپاۋ كەلىسىمىن ساقتاسا سوڭعى بەيبىتشىلىك كەلىسىمىنە قول قويىلادى. بۇل كەلىسىم اقش-تىڭ 13 مىڭنان استام اسكەرىنىڭ اۋعانستاننان شىعارىلۋىنا الىپ كەلەدى دەگەن مالىمەتتەر دە بار. وسىلايشا، اقش ءوزىنىڭ اۋعانستانداعى سوعىسىن توقتاتقان بولىپ كورىنبەك.

اقش تالىپتەرمەن 18 اي بويى كەلىسسوز جۇرگىزدى. كاتار ەكى تاراپقا كەلىسسوز ۇستەلىن ازىرلەپ بەردى. بۇل كەلىسىم مازمۇندارىندا اقش-پەن وداقتاس شەتەلدىك كۇشتەردىڭ اۋعانستاننان شەگىنۋى تۋرالى دا تارماقتاردىڭ بار ەكەنىن كاتار اقپارات قۇرالدارىندا جازىلىپ جاتىر. ال، ەندى اقش اسكەرىنىڭ تولىق شەگىنەتىنى الدە 8600 ادامعا قىسقارۋى تۋرالى سوڭعى شەشىم شىققان جوق. سونداي-اق، كەلىسىمگە ساي تالىپتەر تەرروريزمگە قارسى كۇرەسۋگە مىندەت الماق. بۇل دا بولسا كەلىسىمنىڭ نازار اۋدارارلىق تارماقتارىنىڭ ءبىرى. كەلىسىم اۋعانستاننىڭ ىشكى ديالوگىنا دا وڭ ىقپال جاسايدى دەگەن بولجامدار دا بار.

تالىپتەرمەن ۋاقىتشا اتىستى توقتاتۋ كەلىسىمى اتقارىلىپ جاتقان تۇستا، اقش اسكەري كۇشتەر ەلدەگى وزدەرىن «يسلام مەملەكەتى» تەررورلىق توبىنا قارسى اۋە سوققىلارىن جاساعان.

اۋعانستاندا 19 جىلعا جالعاسقان سوعىسى كەزىندە اقش 1 تريلليون دوللار كولەمىندە شىعىنعا ۇشىرادى جانە اۋعان جەرىندە 2400-گە جۋىق جاۋىنگەرى قازا تاپتى.

“The Qazaq Times”