Ağadilovtiñ qazasına qayğırğan Almatı qalasınıñ belsendileri prezident pen birqatar şendilerdiñ atına talap arız jazdı. 25 aqpan 2020 jıl. Foto: QT

Dulat Ağadilovtiñ qazasına baylanıstı jinalğan Almatı azamattarı prezident pen ministr, prokurordıñ atına talap arız jazdı.

Almatıdağı Celinnıy kinoteatrınıñ mañına jinalğan 50-60 şaqtı belsendi prezident Qasım-Jomart Toqaev, qala prokurorı Bauırjan Jürekbaev men işki ister ministri Erlan Twrğımbaevtıñ atına arız jazıp ötkizdi. Talap arız jazuşılar jauaptı vedomstvonıñ  BAQ arqılı resmi türde jauap beruin swraydı. Narazılar aynalasında policeyler torauıldap twr.

Almatı qalalıq policiya departamentiniñ mañına jinalğandar «tergeudiñ ädil äri möldir jürgiziluin» talap etip, azamattıq pikirine bola «quğındamaudı» swradı. Sonday-aq «azamattıq belsendilerdi zañsız qudalaudı doğarıp, sayasi twtqındar men biılğı mitingte qamalğandardı dereu bosatuı kerek» dep sanaydı.

Belsendiler «Bostandıq!», «Oyan, qazaq, köter bastı!» dep wrandastı. Sonımen qatar olar is barısın aldağı uaqıtta twraqtı äri tabandı türde baqılaytının, Dulat Ağadilovti eske alu jiının wyımdastıratının aytıp tarqastı.

Marqwm Ağadilovti bwrın soñdı «jürek talmasımen» auırmağanın aytqan belsendiler bügin tüste astanada, Almatı jäne Şımkent qalasında narazılıqqa şıqtı. Elordada eluge juıq belsendini policiya departamenti bastığınıñ birinşi orınbasarı Baqıtjan Malıbaev bastağan jasaq tört avtobusqa  küşpen tiep alıp ketken edi.

Protokol toltırmağan, kuäger tartılmağan, advokat şaqırtpay küştep wstap äketti deydi aşınğan azamattıq belsendiler. Aymaqtağı narazılar «Nwrswltan jäne  Dariğa Nazarbaevtardıñ, Erlan Twrğımbaevtıñ otstavkasın», «Ağadilovtiñ ölimin ädil teksersin» degen talaptar qoydı. Qwral Seyithanwlı «bilik marqwm öz auruınan nemese spirttik işimdik işip öldi degen jalğan jeleumen aqtaluğa tırısadı» dep oylaydı. Belsendiniñ biri  «halıqtıq repressiyağa qatısqan, atsalısqan ministrden qatardağı sarbazğa deyin jazalanatını halıqaralıq qwqıqtıq qatınas qwjattarında qarastırılğan» deydi. Jinalğandar Ağadilovti öziniñ altı balasına barına qaramastan, «tapqan tiın-tebenin köpbalalı äri äleumettik häli müşkil otbasılarğa bölip beretinin», onıñ «keñ jürekti, meyirban» adam bolğanın közine jas alıp ayttı.

Ağadilovtiñ qazasına qayğırğan Almatı qalasınıñ belsendileri prezident atına talap arız joldadı. 25 aqpan 2020 jıl. Foto: QT

Policiya departamenti baspasöz qızmetiniñ jazuınşa «biıl qañtar ayında Dulat Ağadilge ayıp tağılıp, «eşqayda ketpeu» turalı şara qoldanılğan. Tergeuge kelmegenine baylanıstı sot şeşimimen 24 aqpanda qamauğa alınğan».

Qwzırlı organdar bügin keşkisin ötken brifingte azamattıq qwqıq pen demokratiyalıq qwndılıqtardıñ orındaluın talap ete jürip birneşe ret sottalğan belsendi Ağadilov öliminiñ sebebin «jürek qan tamırlarınıñ jetispeuşiligi» dep atadı.

Ağadilovtiñ ölimine baylanıstı Almatı qalasında ötken narazılıq. 25 aqpan 2020 jıl. Foto: QT

"The Qazaq Times"