Eki prezidenttiñ qos keñsesi: Aqorda men Kitaphana. Fotokollaj: QT

Eks-prezident Nazarbaev ükimet basşısı men wlttıq bank törağasın qabıldap jatqan twsta qazirgi prezident Toqaev el işinde «bilik täpsirşisi» atanıp ketken aqparat ministrin qabıldap, «Halıq ünine qwlaq asatın memleket» twjırımdaması men azamattıq qoğam turalı söz qozğaptı-mıs.

Keşe, aqpannıñ 19-ı eki birdey prezident Nazarbaev pen Toqaev jarısa iri şeneunikterdi qabıldau künin ötkizdi. Aqordanıñ habarlauınşa, memleket basşısı aqparat jäne qoğamdıq damu ministri Däuren Abaevtı qabıldap, eriktiler jılınıñ tiimdi ötkiziluine, olarğa qoldau körsetudiñ naqtı institutın qalıptastıruğa erekşe köñil böludi tapsırdı. Sonday-aq «Halıq ünine qwlaq asatın memleket» twjırımdamasın jüzege asıruğa azamattıq qoğamdı tartudıñ, «Aşıq ükimet» qağidattarın damıtudıñ mañızı zor ekenin aytıptı. Onımen qoymay, prezident ministrge qazaqstandıq BAQ-tı qoldauğa bağıttalğan naqtı şeşim qabıldau jöninde tapsırma bergen desedi.

Apta basında ğana Almatı qalasında belsendilermen miting turalı döñgelek üstel ötkizip, wnağan «wsınıstar qaraladı» dep ketken Abaev kezdesu barısında «prezidentke memlekettiñ aqparattıq sayasatınıñ tetikterin jetildiru, azamattıq qoğammen ıqpaldastıqtı nığaytu, jastardıñ bastamaları men jobalarına qoldau körsetu, sonday-aq diasporalıq jäne dini sayasat bağıtında josparlanğan şaralar turalı» bayandağan körinedi.

Däl osı küni Aqordamen qatar Kitaphanada da mañızdı qabıldau ötti. Prem'er-ministr Asqar Mamin jäne wlttıq bank törağası Erbolat Dosaev Nazarbaevpen kezdesip, esep berip şıqtı. Mamin eldiñ ekonomikalıq jağdayın, al bas bankir Dosaev qañtardağı aqşa-nesie sayasatın jüzege asıru, eldiñ altınvalyuta aktivteri men wlttıq qordıñ ahualı turalı bayandap beripti.

"The Qazaq Times"