ەكى پرەزيدەنتتىڭ قوس كەڭسەسى: اقوردا مەن كىتاپحانا. فوتوكوللاج: QT

ەكس-پرەزيدەنت نازارباەۆ ۇكىمەت باسشىسى مەن ۇلتتىق بانك توراعاسىن قابىلداپ جاتقان تۇستا قازىرگى پرەزيدەنت توقاەۆ ەل ىشىندە «بيلىك ءتاپسىرشىسى» اتانىپ كەتكەن اقپارات ءمينيسترىن قابىلداپ، «حالىق ۇنىنە قۇلاق اساتىن مەملەكەت» تۇجىرىمداماسى مەن ازاماتتىق قوعام تۋرالى ءسوز قوزعاپتى-مىس.

كەشە، اقپاننىڭ 19-ى ەكى بىردەي پرەزيدەنت نازارباەۆ پەن توقاەۆ جارىسا ءىرى شەنەۋنىكتەردى قابىلداۋ كۇنىن وتكىزدى. اقوردانىڭ حابارلاۋىنشا, مەملەكەت باسشىسى اقپارات جانە قوعامدىق دامۋ ءمينيسترى داۋرەن اباەۆتى قابىلداپ، ەرىكتىلەر جىلىنىڭ ءتيىمدى وتكىزىلۋىنە، ولارعا قولداۋ كورسەتۋدىڭ ناقتى ينستيتۋتىن قالىپتاستىرۋعا ەرەكشە كوڭىل ءبولۋدى تاپسىردى. سونداي-اق «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋعا ازاماتتىق قوعامدى تارتۋدىڭ، «اشىق ۇكىمەت» قاعيداتتارىن دامىتۋدىڭ ماڭىزى زور ەكەنىن ايتىپتى. ونىمەن قويماي، پرەزيدەنت مينيسترگە قازاقستاندىق باق-تى قولداۋعا باعىتتالعان ناقتى شەشىم قابىلداۋ جونىندە تاپسىرما بەرگەن دەسەدى.

اپتا باسىندا عانا الماتى قالاسىندا بەلسەندىلەرمەن ميتينگ تۋرالى دوڭگەلەك ۇستەل وتكىزىپ، ۇناعان «ۇسىنىستار قارالادى» دەپ كەتكەن اباەۆ كەزدەسۋ بارىسىندا «پرەزيدەنتكە مەملەكەتتىڭ اقپاراتتىق ساياساتىنىڭ تەتىكتەرىن جەتىلدىرۋ، ازاماتتىق قوعاممەن ىقپالداستىقتى نىعايتۋ، جاستاردىڭ باستامالارى مەن جوبالارىنا قولداۋ كورسەتۋ، سونداي-اق دياسپورالىق جانە ءدىني ساياسات باعىتىندا جوسپارلانعان شارالار تۋرالى» بايانداعان كورىنەدى.

ءدال وسى كۇنى اقوردامەن قاتار كىتاپحانادا دا ماڭىزدى قابىلداۋ ءوتتى. پرەمەر-مينيستر اسقار مامين جانە ۇلتتىق بانك توراعاسى ەربولات دوساەۆ نازارباەۆپەن كەزدەسىپ، ەسەپ بەرىپ شىقتى. مامين ەلدىڭ ەكونوميكالىق جاعدايىن، ال باس بانكير دوساەۆ قاڭتارداعى اقشا-نەسيە ساياساتىن جۇزەگە اسىرۋ، ەلدىڭ التىنۆاليۋتا اكتيۆتەرى مەن ۇلتتىق قوردىڭ احۋالى تۋرالى بايانداپ بەرىپتى.

"The Qazaq Times"