Sırtqı ister ministri Qayrat Äbdirahmanovtıñ Franciyağa saparı.

2017 jılğı 28-29 naurızda Franciyanıñ Sırtqı ister jäne halıqaralıq damu ministri Jan-Marko Eyronıñ şaqıruımen Qazaqstannıñ Sırtqı ister ministri Qayrat Äbdirahmanov Parijde jwmıs saparımen boldı. Bwl turalı vedomstvonıñ resmi saytında habarlandı. 

Francuz Respublikası jäne Ortalıq Aziya elderi arasında diplomatiyalıq qarım-qatınastardıñ 25 jıldığına oray Franciya, Qazaqstan, Özbekstan sırtqı sayasi vedomstvolarınıñ basşıları, Qırğızstan, Täjikstan jäne Türikmenstan sırtqı ister ministrleri orınbasarlarınıñ birlesken kezdesuleri sapardıñ mañızdı bölimi boldı.

Q. Äbdirahmanov is-şarada söylegen sözinde Ortalıq Aziya älemniñ serpindi damıp kele jatqan öñirleriniñ biri ekenin atap ötti. «Qazaqstandı öñir boyınşa ekonomikalıq ösim men twraqtılıqtıñ polyusi etuge jäne elimiz aymaqtağı francuz dostarı men körşilerine keñ ıntımaqtastıqqa äzir», - dedi ministr.

Ministr Qazaqstan Ortalıq Aziya elderi arasındağı qarım-qatınastarda teñqwqıqtıq jäne özaratiimdilik qağidatın wstanatınına nazar audardı. «Bizdi soñğı uaqıtta öñirimizdiñ damuındağı bayqalıp otırğan oñ ürdister quantadı. Bwl Ortalıq Aziya elderi arasındağı qarım-qatınastarda şeşilmeytin mäseleler joq ekenin däleldey tüsedi», - dep basa ayttı Q. Äbdirahmanov.

QR SİM basşısı Ortalıq Aziyada barlıq qızığuşılıq tanıtqan elder üşin beybitşilik, qauipsizdik, ıntımaqtastıq jäne damu negizinde üylesimdi baylanıstırğan öñirlik model' qalıptasıp, sınnan ötui mümkin ekenine ülken senimin bildirdi. Bwl twrğıdan alğanda, Franciyanıñ klimattıñ özgerui, su, azıq-tülik, energetikalıq jäne yadrolıq qauipsizdikke, twraqtı damu, terrorizmge qarsı küres, mädeni mwranı qorğau maqsattarın iske asıruğa qatıstı jahandıq mäselelerdi şeşudegi ozıq röliniñ mañızdılığı atap ötildi.

Q. Äbdirahmanov Europalıq Odaq – Ortalıq Aziya (EO-OA) sayasatı men qauipsizdigi mäseleleri boyınşa joğarı därejedegi Dialogtıñ basım mañızın rastadı. EO–OA arasındağı «Ekonomikalıq damu, investiciyalar, jwmıspen qamtudı qamtamasız etu, jeke sektordı damıtu» attı ıntımaqtastıqtıñ jaña alañın qwru turalı ideyasın iske asırudı qoldap, öz pikirin bildirdi.

Sapar şeñberinde Q. Äbdirahmanovtıñ J.-M. Eyromen jeke ekijaqtı kezdesui kezinde swhbattasuşılar Qazaqstan men Franciya arasındağı jan-jaqtı ıntımaqtastıqtıñ 25 jıldığınıñ qorıtındıların jasap, qazaqstandıq-francuz qarım-qatınastarın odan äri ilgeriletudiñ naqtı qadamdarın atap ötti.

Franciya Qazaqstannıñ Täuelsizdigin alğaş moyındağan elderdiñ biri jäne elimizben strategiyalıq äriptestik turalı Şartqa qol qoyğan alğaşqı europalıq iri memleket. Parij Qazaqstannıñ Europadağı Qauipsizdik jäne Intımaqtastıq jönindegi Wyımınıñ Sammitin Astanada ötkizu turalı wsınısına birinşi ün qosıp, «EKSPO-2017» halıqaralıq mamandırılğan körmesin Astanada ötkizu ornı retinde qoldadı. 2017 jıldıñ basınan beri Qazaqstan men Franciya BWW Qauipsizdik Keñesi qwramında belsendi özara is-äreket etedi jäne Keñes şeñberinde eki eldiñ bastamaların özara qoldaydı.

Sırtqı sayasi vedomstvo basşıları özekti halıqaralıq mäseleler boyınşa, onıñ işinde Auğanstandağı ahual, Siriyadağı janjaldı retteu jäne Astanalıq procestiñ röli, halıqaralıq terrorizm menzorlıq-zombılıq ekstremizminiñ qaterleri men sın-tegeurinderi boyınşa pikir almastı.

Taraptar Franciyanıñ Astanada aldağı uaqıtta ötetin «EKSPO-2017» körmesine qatısuınıñ zor mañızın atap ötti. Parij körmede «jasıl» ekonomika salasında jaña tehnologiyalardı körsetudi, sonday-aq körmeni ötkizu barısında şamamen 50 mädeni is-şara wyımdastırudı josparlap otır.

Francuz kompaniyaları Franciyanıñ barlıq tehnologiyalıq äleuetin iske qosa otırıp, Qazaqstannıñ Üşinşi jañğıruın iske asıruğa äzir. 2005 jıldan bastap Qazaqstan Respublikasınıñ ekonomikasına qwyılğan tikeley francuz investiciyasınıñ mölşeri 13,05 mlrd. AQŞ dollarınan asıp tüsti. Qazaqstanda francuz kapitalınıñ qatısuımen 135 kompaniya tirkelgen, onıñ işinde älemge tanımal Alstom, Danone, Vicat, Peugeot, Total jäne t.b. bar. Aviaciya, lokomotiv, azıq-tülikter üşin titandı qwymalar isi jolğa qoyılğan.

Däl osı küni Q. Äbdirahmanov YUNESKO Bas direktorı Irina Bokovamen jäne EIDW Bas hatşısı Anghel' Gurriamen jeke kezdesuler ötkizdi.

Q. Äbdirahmanov I. Bokovamen kezdesu barısında QR Prezidenti Nwrswltan Nazarbaevtıñ 2015 jılı qaraşada ötken YUNESKO Bas konferenciyasınıñ 38-şi sessiyasında jariyalanğan bastamaların iske asıru boyınşa YUNESKO-men birlesken jwmıstı joğarı bağaladı. Ol Almatı qalasın halıqaralıq wyımnıñ öñirlik habı retinde, onıñ işinde BWW qwrılımdarın eskere otırıp, Qazaqstan Almatıda YUNESKO ayasındağı mädenietterdi jaqındastırudıñ Halıqaralıq ortalığın qwruğa tolıq qoldau körsetuge dayın ekenin atap ötti.

Swhbattasuşılar äriptestiktiñ joğarı deñgeyin bağaladı jäne mädeni äri tabiği mwralardıñ türli ob'ektilerin YUNESKO Halıqaralıq tizilimine engizu boyınşa birlesken qızmetti egjey-tegjeyli talqıladı. Sonday-aq, I. Bokova Qazaqstanda ağımdağı jılğı qırküyekte saparmen keludi josparlap otırğanın habarladı.

A. Gurriamen swhbattasu barısında Qazaqstandağı institucionaldıq ortanı jäne ekonomikalıq ösudi EIDW elderiniñ eñ üzdik täjiribelerine säykes jetildiru, sonday-aq ıntımaqtastıqtıñ Eldik bağdarlamasın 2018 jılğa deyin wzartu, elimizdiñ EIDW komitetindegi märtebesiniñ joğarılatu jäne Auğanstanğa arnalğan damuğa resmi kömektiñ qazaqstandıq jüyesi şeñberindegi Qazaqstannıñ pilottıq jobaları mäseleleri qarastırıldı.

EIDW basşısı wyımnıñ müşelerine Qazaqstannıñ EIDW wsınımdarın iske asıruda qol jetkizgen jetistikteri äser etkenin habarladı. Ol Prezident N. Nazarbaevqa wlttıq ekonomikalıq sayasattı qalıptastıru kezinde EIDW täjiribeleri men standarttarınıñ eskerilui üşin jeke alğısın bildirdi. A. Gurria Q. Äbdirahmanovqa memlekettegi ekonomikalıq tübegeyli özgeristerdi tiimdi ilgeriletu boyınşa wsınıstardı qamtitın birqatar bayandamalar men zertteulerdi tabıs etti.

Taraptar barlıq salalar boyınşa belsendi qarım-qatınas jasauğa dayın ekendikterin rastadı.

Parijde ötken kezdesuler kezinde Qazaqstannıñ sayasi vedomstvosınıñ basşısı Memleket basşısı N. Nazarbaevtıñ «Memlekettiñ üşinşi jañğıruı: jahandıq bäsekege qabilettilik» attı Joldauınıñ negizgi erejelerine jan-jaqtı jäne tüpkilikti tüsinikteme berdi, sonday-aq ekonomikalıq reformalardı, onıñ işinde QR Prem'er-Ministriniñ törağalığımen jañğırtu jönindegi Memlekettik komissiyanıñ jwmısı turalı äñgimeledi.

Q. Äbdirahmanov francuz äriptesterimen swhbattasu kezinde Qazaqstanda qoğamdı odan äri demokratizaciyalauğa bağıttalğan QR Konstituciyasına özgerister engizu arqılı sayasi jañğırtu mäselelerine jeke nazar audardı.

“The Qazaq Times”