AQŞ kongressmenderi China Daily basılımına qatıstı tergeudi talap etti. Foto: China Daily

Särsenbi küni AQŞ-tıñ 35 kongressmeni Ädilet departamentine birlesken hat joldağan. Hatta olar Qıtaydıñ China Daily resmi basılımı AQŞ-tıñ «Şeteldik aqparat qwraldarın tirkeu turalı zañın» (FARA) bwzdı dep ayıptap, atalğan basılımğa qatıstı tergeu jürgizudi talap etken.

Şağımdanuşılardıñ aytuınşa, China Daily 2012 jılğa deyin özge basılımdardıñ jarnama orındarın satıp alu turalı AQŞ Ädilet ministrligine eşqanday esep bermegen, sonday-aq, bwl qıtaylıq basılım China Watch jarnamalarına qatıstı qarjılıq esepter turalı mälimetterdi jasırğan.

China Daily AQŞ-ta 1983 jılı şeteldik aqparattıq agenttik retinde tirkelgen. AQŞ-tıñ «Şeteldik aqparat qwraldarın tirkeu turalı zañı» (FARA) şeteldik aqparat agenttikterinen «eki nemese odan da köp adam jüktegen» jarnamalıq materialdardıñ köşirmelerin Ädilet ministrligine wsınudı, sonımen birge, qarjılıq şığındarı turalı esepti eki jılda bir ret körsetip otırudı talap etedi.

Soñğı 30 jıl işinde China Daily AQŞ-tıñ birqatar iri basılımdarında jarnamalıq bölimderdi satıp alıp, öziniñ jañalıqtar maqalalarına wqsaytın «China Watch» maqalaların jariyalap otırğan.

«China Daily - bwl Qıtay Kommunistik partiyası rejimniñ jalğasıp jatqan zwlımdıqtarın jasıru üşin paydalanatın jekswrın ügit-nasihat qwralı», - dedi Djim Benks, birlesken hattı wyımdastıruşı jäne Indiana ştatınıñ respublikaşılı. Şağımdanuşı kongressmender Ädilet departamentinen China Daily-dıñ FARA erejelerin bwzuı onıñ ekonomikalıq, qwqıqtıq saldarı turalı anıqtaudı talap etti.

“The Qazaq Times”