Qasım-Jomart Toqaev. Foto: Aqorda

Parlament mäjilisiniñ jalpı otırısında birinşi oqılımda-aq maqwldanğan «QR-nıñ keybir zañnamalıq aktilerine soğıs jağdayı mäseleleri boyınşa özgerister men tolıqtırular engizu turalı» zañ jobası negizinde prezident ökilettiligi keñeyedi.

Zañ jobasınıñ negizgi maqsatı – memlekettiñ qorğanısqa jäne äskeri qauipsizdikti qamatamasız etuge dayındıq jüyesin jetildiru desedi. Zañ jobası Eñbek kodeksine, «Qorğanıs jäne Qarulı Küşter turalı», «Jwmıldıru dayındığı turalı», «Soğıs jağdayı turalı» üş zañğa tüzetu engizudi közdeydi.

«Onıñ maqsatı – memlekettiñ soğıs jağdayı kezinde jwmıs isteui, sonımen qatar beybit uaqıtta oğan dayındalu mäselesin qwqıqtıq retteu. Äsirese «Soğıs jağdayı turalı» zañda prezident ökilettigin tolıqtıru wsınılıp otır. Ol beybit uaqıtta iske asırıladı. Bwl soğıs jağdayı salasın qoldanu tärtibin ayqındau, Qarulı küşter Joğarğı bas qolbasşılığı stavkası turalı, Qorğanıs keñesteri turalı, soğıs jağdayı kezeñinde Ükimet qızmetin wyımdastıru turalı erejeni bekitu bolıp otır», – dedi qorğanıs ministriniñ birinşi orınbasarı – QR QK bas ştabınıñ bastığı  Mwrat Bektanov.

Sonday-aq ükimet qızmeti beybit uaqıtta soğıs jağdayı kezeñindegi ministrlikter turalı erejeni bekitu, soğıs jağdayında ükimet qwrılımına kiretin memlekettik organdı soğıs uaqıtındağı ştatqa köşirudi wyımdastıru, jergilikti atqaruşı organğa azamattıq jäne aumaqtıq qorğanıs salasın qamtamasız etu mindetin belgileu ökilettiligimen tolıqpaq.

Vedomstvonıñ vice-ministri öz sözin:

– Sonımen qosa soğıs jağdayında jergilikti atqaruşı organnıñ ökilettigin közdeu, olarğa «oblıstıñ, respublikalıq mañızı bar qalanıñ, astananıñ qorğanıs keñesin» qwruğa ökilettik beru wsınıladı. Bwl rette qorğanıs keñesteri äskeri basqaru organı retinde soğıs jağdayı salasın retteudi qamtamasız etedi. Olar tek soğıs jağdayında ğana qwrıladı. Sondıqtan Qarulı küşter qwrılımına kirmeydi», – dep naqtıladı.

“The Qazaq Times”