كوررەكتسيالانعان «سوعىس جاعدايى تۋرالى» زاڭ بويىنشا  پرەزيدەنت وكىلەتتىلىگى كەڭەيەدى

پارلامەنت ءماجىلىسىنىڭ جالپى وتىرىسىندا ءبىرىنشى وقىلىمدا-اق ماقۇلدانعان «قر-نىڭ كەيبىر زاڭنامالىق اكتىلەرىنە سوعىس جاعدايى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى نەگىزىندە پرەزيدەنت وكىلەتتىلىگى كەڭەيەدى.

زاڭ جوباسىنىڭ نەگىزگى ماقساتى – مەملەكەتتىڭ قورعانىسقا جانە اسكەري قاۋىپسىزدىكتى قاماتاماسىز ەتۋگە دايىندىق جۇيەسىن جەتىلدىرۋ دەسەدى. زاڭ جوباسى ەڭبەك كودەكسىنە، «قورعانىس جانە قارۋلى كۇشتەر تۋرالى»، «جۇمىلدىرۋ دايىندىعى تۋرالى»، «سوعىس جاعدايى تۋرالى» ءۇش زاڭعا تۇزەتۋ ەنگىزۋدى كوزدەيدى.

«ونىڭ ماقساتى – مەملەكەتتىڭ سوعىس جاعدايى كەزىندە جۇمىس ىستەۋى، سونىمەن قاتار بەيبىت ۋاقىتتا وعان دايىندالۋ ماسەلەسىن قۇقىقتىق رەتتەۋ. اسىرەسە «سوعىس جاعدايى تۋرالى» زاڭدا پرەزيدەنت وكىلەتتىگىن تولىقتىرۋ ۇسىنىلىپ وتىر. ول بەيبىت ۋاقىتتا ىسكە اسىرىلادى. بۇل سوعىس جاعدايى سالاسىن قولدانۋ ءتارتىبىن ايقىنداۋ، قارۋلى كۇشتەر جوعارعى باس قولباسشىلىعى ستاۆكاسى تۋرالى، قورعانىس كەڭەستەرى تۋرالى، سوعىس جاعدايى كەزەڭىندە ۇكىمەت قىزمەتىن ۇيىمداستىرۋ تۋرالى ەرەجەنى بەكىتۋ بولىپ وتىر»، – دەدى قورعانىس ءمينيسترىنىڭ ءبىرىنشى ورىنباسارى – قر قك باس شتابىنىڭ باستىعى  مۇرات بەكتانوۆ.

سونداي-اق ۇكىمەت قىزمەتى بەيبىت ۋاقىتتا سوعىس جاعدايى كەزەڭىندەگى مينيسترلىكتەر تۋرالى ەرەجەنى بەكىتۋ، سوعىس جاعدايىندا ۇكىمەت قۇرىلىمىنا كىرەتىن مەملەكەتتىك ورگاندى سوعىس ۋاقىتىنداعى شتاتقا كوشىرۋدى ۇيىمداستىرۋ، جەرگىلىكتى اتقارۋشى ورگانعا ازاماتتىق جانە اۋماقتىق قورعانىس سالاسىن قامتاماسىز ەتۋ مىندەتىن بەلگىلەۋ وكىلەتتىلىگىمەن تولىقپاق.

ۆەدومستۆونىڭ ۆيتسە-ءمينيسترى ءوز ءسوزىن:

– سونىمەن قوسا سوعىس جاعدايىندا جەرگىلىكتى اتقارۋشى ورگاننىڭ وكىلەتتىگىن كوزدەۋ، ولارعا «وبلىستىڭ، رەسپۋبليكالىق ماڭىزى بار قالانىڭ، استانانىڭ قورعانىس كەڭەسىن» قۇرۋعا وكىلەتتىك بەرۋ ۇسىنىلادى. بۇل رەتتە قورعانىس كەڭەستەرى اسكەري باسقارۋ ورگانى رەتىندە سوعىس جاعدايى سالاسىن رەتتەۋدى قامتاماسىز ەتەدى. ولار تەك سوعىس جاعدايىندا عانا قۇرىلادى. سوندىقتان قارۋلى كۇشتەر قۇرىلىمىنا كىرمەيدى»، – دەپ ناقتىلادى.

“The Qazaq Times”