Astanadağı baspanasız otbasınıñ ironiyası: «Men erekşe elde tudım»

Astana äkimdiginiñ aldına 9 qañtar sağat 11:00 şamasında astanalıq suretşi Ashat Ahmediyarov arqasına şeneunik ülgisindegi kost'yumniñ oñ jağın kiip,  elorda mäslihat ığimaratınıñ aldına kelgen. Belsendiniñ performansı äleumettik jeli men internet sayttarında taralıp jatır. 

Ol qolına «Men erekşe elde tuıldım (tudım – red.)» degen jazuı bar 14 jastağı mügedektigi tanılğan Aida Äbdijapparovamen birge şıqtı. Aida – belgili qwqıq qorğauşı, advokat Bolatbek Bilälov pen Aqmaral Bilälovanıñ qızı. Bilälovtar otbasınıñ jaqın tanısı «kreativti qarsılıq akciyasın» ötkizuge mäjbür ekenin aytadı.

– Ironiya mänindegi akciyanıñ ideyası – bıltır jıl basında bes säbidiñ qazasınan keyin bilik mäseleni şeşuge tırıstı, biraq mügedekterdiñ jağdayına kelgende özin saudager siyaqtı wstaydı. Teris qarap twrıp söylesedi, halıqtıñ müşkil häline moyın bwrğısı kelmeydi, – dedi ol bizge.

13 jıldan beri baspana mäselesinen äbden qajığan Bilälovter otbası. Foto: facebook jelisinen

Üş perzent, sonıñ işinde tuğanınan beri mügedek qız tärbielep otırğan Bilälovter äli künge deyin baspanasız. 13 jıl boyı päter kezeginde twrğan qiın jağdaydağı otbasınıñ barmağan, tabaldırığın tozdırmağan mekemesi joq. Akciyanı wyımdastıruşı:

– Meni öner adamı, suretşi retinde äleumettik qwqığınan qağılğan balanıñ jağdayı qattı alañdatadı. Aida ekeumiz sal auruımen auıratın balası bar äleumettik äljuaz otbası men astana äkimdiginiñ dialogına qoğam nazarın audartu üşin osınday proteske bardıq. Halqına sırtın berip twrıp qoğamdıq dialog ornatuğa tırısatın «erekşe» elimizdiñ biligi oñ şeşim şığarğan küni spektakl'diñ soñında kost'yumimdi oñına qaratıp, dwrıs kiinip kelemin, – deydi Ahmediyarov.

Astana äkimdiginiñ aldında ötken «Men erekşe elde tudım» ironiyalıq akciyası. Foto: Ashat Ahmediyarov

Belsendi suretşiniñ sözine qarağanda, policiya olardı wstamağan äri äkim keñesşisi «atalğan sanattağı azamattarğa twrğın üy salınatını turalı uädemen» şığarıp salğan.

"The Qazaq Times"