Belsendi Janbolat Mamay. 24 jeltoqsan 2019 jıl. Foto: facebook jelisinen skrinşot-qiındı

16 jeltoqsan Almatıda ötken sankciyalanbağan mitingke şıqtı degen ayıppen 15 täulikke deyin qamalğan 20 şaqtı adam 4 künnen beri aştıq jariyalap otır. Äzirge 50-ge tarta belsendi qamalğandardı qoldauğa jinaldı. 

Äkimşilik qamau qaqpasınıñ aldına jinalğandar «Bostandıq!», «Oyan, qazaq!», «Taldıqorğanda wstalğan 5 jigitti bosatudı talap etemiz» dep wrandastı. Sonday-aq olar «sayasi twtqındardı Aron Atabekov, Mwhtar Jäkişevti», «bloger Azamat Baykenovti» jaña jılğa deyin dereu bosatudı talap etti. Qolına jalauşa wstağan köpşiliktiñ arasında spikerler kezektesip öz pikirin bildirdi. Qazaqstannıñ Demokratiyalıq partiyasınıñ wyımdastıru komitetiniñ jetekşisi Janbolat Mamay "jazıqsız ayıptaluşıdardı qorğau azamattıq qoğamnıñ borışı" deydi.

– Abaqtıda otırğan azamattardıñ bäri jazıqsız qudalanğan sayasi twtqındar. Olar öziniñ konstituciyalıq qwqığın paydalanıp, beybit mitingke şıqtı. Eşqanday zañdı bwzıp nemese qarsılıq körsetken joq. Olardı qudalau, qamau – diktaturanıñ belgisi. Sondıqtan keşegi bolsın, meyli bügingi bolsın, sayasi twtqındardı qorğau, olarğa qoldau körsetu – barlığımızdıñ ortaq mindetimiz, parızımız, – dedi Mamay.

Advokat Janar Balğabaevağa Almatıdağı äkimşilik jazağa tartılğandardı uaqıtşa qamauda otırğan qorğauındağı belsendiler Ashat Jeksebaev pen Qanat Jaqıpov aytqan. Advokattıñ aytuınşa, Äkimşilik kodekstiñ 488-babı boyınşa («Miting ötkizu jäne wyımdastıru tärtibin bwzu») qamauda otırğandar özderin tez arada bosatudı talap etedi.

Almatıdağı äkimşilik uaqıtşa qamauınıñ aldında narazılıq jiınında söylep twrğan advokat Janar Balğabaeva. 24 jeltoqsan 2019 jıl. Foto: facebook jelisinen skrinşot-qiındı

Täuelsizdik küni qarsañında äkimşilik jazağa tartılıp, 13 täulikke qamalğan Noyan Raqımjanov ta qamauda aştıq jariyalağanın aytadı. Ol keşe, 23 jeltoqsanda qamaudan bosap şıqtı.

– Menimen birge Rayımbek esimdi bir jas jigit şıqtı, ekeuimizdi alıp tastağanda jiırmadan asa adam aştıq jariyalap otır. Biz de eki kün aştıq jariyaladıq, – dedi belsendi.

Almatı qalalıq policiya departamenti Azattıqqa qamauda otırğandardıñ aştıq jariyalanğanın rastamadı.

Qazaqstanda 16 jeltoqsan – Täuelsizdik küni qarsañında josparlanğan bilikke qarsı miting aldında Almatı men Nwr-Swltanda onnan astam belsendi qamalğan. Olar qaraşanıñ soñında ötken mitingiler üşin jazalanğan.

Aştıq jariyalauğa mäjbür bolğan belsendiler şeşimge apellyaciyalıq şağım tüsirgenimen, sot mwnı qanağattandırmadı.

İİM Täuelsizdik küni Almatı men elordada 55 adamnıñ «sankciyalanbağan mitingke qatıstı» dep wstağanın mälimdegen bolatın.

"The Qazaq Times"