16 جەلتوقسان الماتىدا وتكەن سانكتسيالانباعان ميتينگكە شىقتى دەگەن ايىپپەن 15 تاۋلىككە دەيىن قامالعان 20 شاقتى ادام 4 كۇننەن بەرى اشتىق جاريالاپ وتىر. ازىرگە 50-گە تارتا بەلسەندى قامالعانداردى قولداۋعا جينالدى. 

اكىمشىلىك قاماۋ قاقپاسىنىڭ الدىنا جينالعاندار «بوستاندىق!»، «ويان، قازاق!»، «تالدىقورعاندا ۇستالعان 5 جىگىتتى بوساتۋدى تالاپ ەتەمىز» دەپ ۇرانداستى. سونداي-اق ولار «ساياسي تۇتقىنداردى ارون اتابەكوۆ، مۇحتار جاكىشەۆتى»، «بلوگەر ازامات بايكەنوۆتى» جاڭا جىلعا دەيىن دەرەۋ بوساتۋدى تالاپ ەتتى. قولىنا جالاۋشا ۇستاعان كوپشىلىكتىڭ اراسىندا سپيكەرلەر كەزەكتەسىپ ءوز پىكىرىن ءبىلدىردى. قازاقستاننىڭ دەموكراتيالىق پارتياسىنىڭ ۇيىمداستىرۋ كوميتەتىنىڭ جەتەكشىسى جانبولات ماماي "جازىقسىز ايىپتالۋشىداردى قورعاۋ ازاماتتىق قوعامنىڭ بورىشى" دەيدى.

– اباقتىدا وتىرعان ازاماتتاردىڭ ءبارى جازىقسىز قۋدالانعان ساياسي تۇتقىندار. ولار ءوزىنىڭ كونستيتۋتسيالىق قۇقىعىن پايدالانىپ، بەيبىت ميتينگكە شىقتى. ەشقانداي زاڭدى بۇزىپ نەمەسە قارسىلىق كورسەتكەن جوق. ولاردى قۋدالاۋ، قاماۋ – ديكتاتۋرانىڭ بەلگىسى. سوندىقتان كەشەگى بولسىن، مەيلى بۇگىنگى بولسىن، ساياسي تۇتقىنداردى قورعاۋ، ولارعا قولداۋ كورسەتۋ – بارلىعىمىزدىڭ ورتاق مىندەتىمىز، پارىزىمىز، – دەدى ماماي.

ادۆوكات جانار بالعاباەۆاعا الماتىداعى اكىمشىلىك جازاعا تارتىلعانداردى ۋاقىتشا قاماۋدا وتىرعان قورعاۋىنداعى بەلسەندىلەر اسحات جەكسەباەۆ پەن قانات جاقىپوۆ ايتقان. ادۆوكاتتىڭ ايتۋىنشا، اكىمشىلىك كودەكستىڭ 488-بابى بويىنشا («ميتينگ وتكىزۋ جانە ۇيىمداستىرۋ ءتارتىبىن بۇزۋ») قاماۋدا وتىرعاندار وزدەرىن تەز ارادا بوساتۋدى تالاپ ەتەدى.

الماتىداعى اكىمشىلىك ۋاقىتشا قاماۋىنىڭ الدىندا نارازىلىق جيىنىندا سويلەپ تۇرعان ادۆوكات جانار بالعاباەۆا. 24 جەلتوقسان 2019 جىل. فوتو: facebook جەلىسىنەن سكرينشوت-قيىندى

تاۋەلسىزدىك كۇنى قارساڭىندا اكىمشىلىك جازاعا تارتىلىپ، 13 تاۋلىككە قامالعان نويان راقىمجانوۆ تا قاماۋدا اشتىق جاريالاعانىن ايتادى. ول كەشە، 23 جەلتوقساندا قاماۋدان بوساپ شىقتى.

– مەنىمەن بىرگە رايىمبەك ەسىمدى ءبىر جاس جىگىت شىقتى، ەكەۋىمىزدى الىپ تاستاعاندا جيىرمادان اسا ادام اشتىق جاريالاپ وتىر. ءبىز دە ەكى كۇن اشتىق جاريالادىق، – دەدى بەلسەندى.

الماتى قالالىق پوليتسيا دەپارتامەنتى ازاتتىققا قاماۋدا وتىرعانداردىڭ اشتىق جاريالانعانىن راستامادى.

قازاقستاندا 16 جەلتوقسان – تاۋەلسىزدىك كۇنى قارساڭىندا جوسپارلانعان بيلىككە قارسى ميتينگ الدىندا الماتى مەن نۇر-سۇلتاندا وننان استام بەلسەندى قامالعان. ولار قاراشانىڭ سوڭىندا وتكەن ميتينگىلەر ءۇشىن جازالانعان.

اشتىق جاريالاۋعا ءماجبۇر بولعان بەلسەندىلەر شەشىمگە اپەللياتسيالىق شاعىم تۇسىرگەنىمەن، سوت مۇنى قاناعاتتاندىرمادى.

ءىىم تاۋەلسىزدىك كۇنى الماتى مەن ەلوردادا 55 ادامنىڭ «سانكتسيالانباعان ميتينگكە قاتىستى» دەپ ۇستاعانىن مالىمدەگەن بولاتىن.

"The Qazaq Times"