Körneki kollaj. Foto: aşıq derekközderden

Almatınıñ eks-äkimi Viktor Hrapunov öziniñ facebook parığında şveycariyalıq Tribune de Genève  basılımına bergen swhbatın bölisip, özine qatıstı sot isteri turalı mälimde jasadı.

 Hrapunov interv'yuinde Şveycariyada özine qarsı qozğalğan qılmıstıq istiñ ayaqtalğanı turalı mälimdedi. Ol «jüzdegen million dollardı jımqırdı» degen küdikke ilikken edi. Dese de jeti jılğa sozılğan atışulı iske qatıstı ötken ayda Reuters aqparat agenttigi Jeneva prokuraturasınıñ oğan tağılğan ayıptı alıp tastağannın habarlağan bolatın.

«Jeti jıl boyı biz Şveycariyanıñ sot töreligi tarapınan bolğan ünsiz twqırtu maqsatın ärdayım ayıptadıq. Jeti jıl – wzaq uaqıt. Şveycariyada bastalğan quğın-sürgindi eske tüsirgende, qalayşa aşulanbaysıñ? Birneşe apta jauap aluğa keyde osı Jenevada rejim agentteri qatısadı. Ekstradiciyadan qorıqqan jıldarı Qazaqstan bizge qarsı bar küşin paydalandı. Tipti Şveycariya parlamentin aynalıp ötip, rejim jaqtauşıları meni Jenevada wstap, wrlap äketuge tırıstı», – deydi eks-almatılıq.

Hrapunov özin «zañsız bayığan auqattı käsipker» emes, keñes kezde öz eñbegimen köterilgen elektrik dep sanaytının aytqan. Ol öziniñ «şınayı beynesin» sipattauğa tırıstı:

«Men käsipker emespin. Men keñes däuirindegi mansap satısınıñ barlığınan ötip, ministr bolıp, sodan keyin ömirimniñ otız bes jılın Almatı qalasına arnağan elektrik bolıp qala beremin. Iä, barlıq joğarı lauazımdı şeneunikter siyaqtı, täuelsizdik alğannan keyin men demokratiyalıq bolaşaqqa sendim. Biraq oppoziciya liderleriniñ, onıñ işinde Almatıda menen bwrın äkim bolğan dosım Zamanbek Nwrqadilovtiñ öliminen keyin bwl rejimge qızmet ete almadım», – dedi.

Sonımen qosa Hrapunov Şveycariya biliginiñ özine qarsı is qozğağanına eş renjimeytinin jäne aldağı uaqıtta elge oralatını turalı söz etti. Ol öz sözin «Men patriot bolıp qala beremin. Künderdiñ bir küni elge oralıp, Qazaqstanda tübegeyli reformalardı bastau üşin bilikke keletin qazaq jastarına paydam tiedi dep ümittenemin», – dep tüyindedi.

Bıltır küzde Almatınıñ qılmıstıq ister jönindegi mamandandandırılğan audanaralıq sotı onı «qızmetin asıra paydalana otırıp, jemqorlıqpen aqşa jımqıru» ayıbımen kinäli dep tauıp, sırttay 17 jılğa sottağan. Sonday-aq sot onıñ äyeli Leyla Hrapunovanı da sırttay 14 jılğa ükim oqıp, otbaslıq ortaq mülikterin tärkileuge şeşim şığarğan. Qazir erli-zayıptı Hrapunovtar Şveycariyada twradı.

Şveycariyalıq "Tribune de Genève" gazetinde jariyalanğan Hrapunovtıñ "Qazaqstan rejimi şveycriyalıq sottı manipulyaciyalamaq boldı" maqalası. Foto: aşıq derekköz

"The Qazaq Times"