Putin men Zelenskiy alğaş ret kezdespek. Foto: EPA/REUTERS.

Bügin Ukraina, Resey, Germaniya jäne Franciya liderleri Parijde bas qosıp, Ukraina şığısındağı qayşılıqtı şeşu üşin üstel basına otıradı. Bwl soñğı üş jıl işindegi «Normand formatındağı» alğaşqı kezdesu jäne Vladimir Putin men Vladimir Zelenskiy arasındağı birinşi retki kezdesu.

Biraq, kezdesudiñ nätijesi turalı ümitten küdik basım. Köptegen aqparat qwraldarı Ukrainanıñ şığısındağı dağdarıstıñ nüktesi Parijde qoyılmaydı dep qaraydı.

Ukraina prezidenti Zelenskiy Parije Resey prezidentimen kezdeskeli jatqanda Kievte oppoziciya tarabı şeru wyımdastırıp «KAPITULYACIYAĞA JOL JOQ!», «MÄSKEUDEN ALIS BOL!», «RESEYDİÑ GAZI – MOYNIÑDAĞI AJIRĞI» degen jalaular köterdi.

Parijdegi jwrt nazarın audaratın oqiğa – Putin men Zelenskiy arasındağı kezdesu bolmaq. Bwğan deyin eki el basşısı tek telefon arqılı ğana söylesken edi. Zelenskiy Parijge attanar aldında Resey prezidentimen ekijaqtı kezdesudi josparlağanın rastadı. Al, Ukrainanıñ bwrınğı prezidenti Petr Poroşenko Zelenskiydi Putinmen kezdespeuge şaqırğan.

Ukrainanıñ bwrınğı prezidenti Petr Poroşenko. Foto: in.ua

Poroşenko sözinde «Putinmen betpe-bet söylesuden aulaq bol dep şın jürekten keñes berer edim, eger bwl mümkin bolmasa, onda KNB-lik manipulyaciyağa aldırmay, emociyalıq oylardan saq bol», – degen.

Al, Zelenskiy Parijge attanar aldında: «Men neden qorqam?! Men erkin eldiñ prezidentimin. Men normaldı taza adammın. Men öz memleketimdi eşkimge, eş uaqıtta satpaymın. Aqiqat bizdiñ jaqta», – degen.

Putin bolsa sammit turalı: «Olar jaqsı dayındalıp kelip, qwr sözge boy wrmay, nätijeli kezdesu bolsa boldı», – depti.

«Normand formatındağı» kezdesu turalı tamızda Zelenskiy bastama kötergen edi. Putin de «törttik» kezdesudi qwptağan. Onıñ resmi ökili Dmitriy Peskov ta qwptağanın bildirdi, biraq ol sözinde: «Bwl kezdesuden eşqanday nätije kütudiñ keregi joq», – degen bolatın.

“The Qazaq Times”