Audarılğan avtobus. 3 jeltoqsan 2019 jıl. Qızılorda oblısı. Foto: TJK

Bügin tañğa tayau Qızılorda oblısı aumağında, Qızılorda-Qwmköl bağıtında 36 jolauşısı bar avtobus audarılıp, 8 adam qaza taptı.

 İİM TJK baspasöz qızmetiniñ mälimetine qarağanda, apat 3 jeltoqsanğa qarağan tañda, sağat 5:25-te Qızılorda-Qwmköl avtojolında bolğan.

Qwmkölden Qızılordağa qaray kele jatqan avtobus jürgizuşisi köktayğaqtıñ saldarınan tizginge ie bola almay, joldan şığıp ketken. Äzirge qolda bar aqpar boyınşa, audarılğan avtobus salonında 36 jolauşı bolğan. Zardap şekkender sanı anıqtalıp jatır.

«Oqiğa Qızılordadan 85 şaqırım jerde boldı. Qızılorda oblısı TJD-da jedel ştab qwrıldı. Qauırt jeli telefonı (7242) 24-41-61, 70-03-28. Oqiğa ornında TJD jeke qwramınan 13 adam men tört tehnika, altı qızmetker men eki tehnika, 12 qızmetker men tört tehnika jwmıs istep jatır», – delingen habarlamada.

İİM Äkimşilik policiya komiteti törağasınıñ orınbasarı Janat Äbdirahmanov 8 adam qaza tauıp, 21 azamat zardap şekkenin ayttı. Onıñ sözinşe, jedel tergeu tobı men jol-tehnikalıq inspekciya jwmıs istep jatır. Alda avtotehnikalıq saraptama jürgiziledi. Belgili bolğanı adurılğan avtobus Qwmkölde jwmıs istegen, Şımkentte tirkelgen "Sauts-oyl" JŞS mwnay kompaniyasına tiesili.

Oblıstıq Policiya departamenti taratqan mälimdemede:

«Apatqa jol qozğalısı erejesin saqtamau jäne mwztayğaq sebep boluı mümkin. Sotaldı tergeu QR Qılmıstıq kodeksiniñ 345-babınıñ 4-böligi ("Avtomobil'di, trolleybustı, tramvaydı ne basqa da mehanikalıq kölik qwralın basqaratın adamnıñ jol jürisi nemese kölik qwraldarın paydalanu qağidaların abaysızda eki nemese odan da köp adamnıñ ölimine äkep soqqan bwzuı") boyınşa jürip jatır. Qajet saraptamalar tağayındaldı», – delingen.

Europa odağı statistika qızmetiniñ dereginşe, Qazaqstan jol apatı köp bolatın älemdegi bes eldiñ qatarına enedi. Jol erejesin saqtamau jäne jol sapası – kölik apattarınıñ negizgi sebebi.​

"The Qazaq Times"