قىزىلوردا وبلىسىندا اۆتوبۋس اۋدارىلىپ، 8 ادام كوز جۇمدى

بۇگىن تاڭعا تاياۋ قىزىلوردا وبلىسى اۋماعىندا، قىزىلوردا-قۇمكول باعىتىندا 36 جولاۋشىسى بار اۆتوبۋس اۋدارىلىپ، 8 ادام قازا تاپتى.

 ءىىم تجك ءباسپاسوز قىزمەتىنىڭ مالىمەتىنە قاراعاندا، اپات 3 جەلتوقسانعا قاراعان تاڭدا، ساعات 5:25-تە قىزىلوردا-قۇمكول اۆتوجولىندا بولعان.

قۇمكولدەن قىزىلورداعا قاراي كەلە جاتقان اۆتوبۋس جۇرگىزۋشىسى كوكتايعاقتىڭ سالدارىنان تىزگىنگە يە بولا الماي، جولدان شىعىپ كەتكەن. ازىرگە قولدا بار اقپار بويىنشا، اۋدارىلعان اۆتوبۋس سالونىندا 36 جولاۋشى بولعان. زارداپ شەككەندەر سانى انىقتالىپ جاتىر.

«وقيعا قىزىلوردادان 85 شاقىرىم جەردە بولدى. قىزىلوردا وبلىسى تجد-دا جەدەل شتاب قۇرىلدى. قاۋىرت جەلى تەلەفونى (7242) 24-41-61, 70-03-28. وقيعا ورنىندا تجد جەكە قۇرامىنان 13 ادام مەن ءتورت تەحنيكا، التى قىزمەتكەر مەن ەكى تەحنيكا، 12 قىزمەتكەر مەن ءتورت تەحنيكا جۇمىس ىستەپ جاتىر»، – دەلىنگەن حابارلامادا.

ءىىم اكىمشىلىك پوليتسيا كوميتەتى توراعاسىنىڭ ورىنباسارى جانات ءابدىراحمانوۆ 8 ادام قازا تاۋىپ، 21 ازامات زارداپ شەككەنىن ايتتى. ونىڭ سوزىنشە، جەدەل تەرگەۋ توبى مەن جول-تەحنيكالىق ينسپەكتسيا جۇمىس ىستەپ جاتىر. الدا اۆتوتەحنيكالىق ساراپتاما جۇرگىزىلەدى. بەلگىلى بولعانى ادۋرىلعان اۆتوبۋس قۇمكولدە جۇمىس ىستەگەن، شىمكەنتتە تىركەلگەن "ساۋتس-ويل" جشس مۇناي كومپانياسىنا تيەسىلى.

وبلىستىق پوليتسيا دەپارتامەنتى تاراتقان مالىمدەمەدە:

«اپاتقا جول قوزعالىسى ەرەجەسىن ساقتاماۋ جانە مۇزتايعاق سەبەپ بولۋى مۇمكىن. سوتالدى تەرگەۋ قر قىلمىستىق كودەكسىنىڭ 345-بابىنىڭ 4-بولىگى ("اۆتوموبيلدi, تروللەيبۋستى، ترامۆايدى نە باسقا دا مەحانيكالىق كولiك قۇرالىن باسقاراتىن ادامنىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن ابايسىزدا ەكi نەمەسە ودان دا كوپ ادامنىڭ ولiمiنە اكەپ سوققان بۇزۋى") بويىنشا ءجۇرىپ جاتىر. قاجەت ساراپتامالار تاعايىندالدى»، – دەلىنگەن.

ەۋروپا وداعى ستاتيستيكا قىزمەتىنىڭ دەرەگىنشە، قازاقستان جول اپاتى كوپ بولاتىن الەمدەگى بەس ەلدىڭ قاتارىنا ەنەدى. جول ەرەجەسىن ساقتاماۋ جانە جول ساپاسى – كولىك اپاتتارىنىڭ نەگىزگى سەبەبى.​

"The Qazaq Times"