Palestina jerine salınğan evrey qwrılıstarı. Foto: BBC.

AQŞ Izrail' men Palestina mäselesindegi wstanımın özgertip, Izrail' tarabınan zañsız salınğan Batıs jağalau aymağındağı qwrılıstardı halıqaralıq zañdarğa say dep moyındadı. Bwl AQŞ-tıñ Izrail'dıñ jaulau äreketterine köz jwma qarauı deuge boladı.

AQŞ Memlekettik departamenti Batıs jağalau mäselesin Izrail' men Palestina arasında kelissöz arqılı şeşu kerek degen mälimdemesin jasadı. «Barlıq taraptıñ jüyesin qarap şıqqannan keyin, Qwrama Ştattar «Batıs jağalaudağı evrey qonıstarı halıqaralıq zañdarğa qayşı emes» degen tiyanaq şığardı. Izrail' qonıstarın zañsız dep qarau qayşılıqtı jeñildetpeydi», – degen resmi mälimdemede.

AQŞ tarabı prezident Tramp kezeñinde Izrail'diñ Palestinağa bağıttağan birqatar qadamdarına qoldau körsetip keledi. Prezident Obama twsındağı keybir zañdar Tramp biligi kezinde özgerdi. Sonıñ işinde Batıs jağalaudağı küştep salınğan evrey qonıstarı turalı zañ da bar. Evrey memleketiniñ basşısı Netan'yahu AQŞ-tıñ kezekti şeşimi «tarihi qatelikti tüzetu» dep bağalağan.

Palestinalıqtardıñ qıstağı jäne evrey qonıstarı. Foto: BBC.

Palestinalıqtar köbirek qonıstanğan Batıs jağalau aymağı 1967 jılğı 6 kündik soğıstan keyin Izrail' jağınan jartılay okkupaciyalanğan. Al, palestinalıqtar Batıs jağalau bolaşaqta täuelsiz Palestinanıñ territoriyası boluı kerek dep qaraydı.

Izrail'men kelissöz jürgizip jatqan Palestina tarabınıñ ökilderi AQŞ şeşimi «tınıştıqqa, beybitşilikke jäne twraqtılıqqa qater töndiredi» dep bağaladı.

Batıs jiek jäne Ierusalim qalasınıñ şığısında 140-tan astam evrey qwrılıstarında 600 mıñnan astam twrğın bar. Halıqaralıq zañ boyınşa bwlar zañsız qonıstanu, jaulau äreketi qatarında qaraladı. Alayda, Izrail' biligi onı joqqa şığaradı. Bwl Izrail'-Palestina arasındağı eñ daulı mäseleniñ biri

“The Qazaq Times”