پالەستينا جەرىنە سالىنعان ەۆرەي قۇرىلىستارى. فوتو: BBC.

اقش يزرايل مەن پالەستينا ماسەلەسىندەگى ۇستانىمىن وزگەرتىپ، يزرايل تارابىنان زاڭسىز سالىنعان باتىس جاعالاۋ ايماعىنداعى قۇرىلىستاردى حالىقارالىق زاڭدارعا ساي دەپ مويىندادى. بۇل اقش-تىڭ يزرايلدىڭ جاۋلاۋ ارەكەتتەرىنە كوز جۇما قاراۋى دەۋگە بولادى.

اقش مەملەكەتتىك دەپارتامەنتى باتىس جاعالاۋ ماسەلەسىن يزرايل مەن پالەستينا اراسىندا كەلىسسوز ارقىلى شەشۋ كەرەك دەگەن مالىمدەمەسىن جاسادى. «بارلىق تاراپتىڭ جۇيەسىن قاراپ شىققاننان كەيىن، قۇراما شتاتتار «باتىس جاعالاۋداعى ەۆرەي قونىستارى حالىقارالىق زاڭدارعا قايشى ەمەس» دەگەن تياناق شىعاردى. يزرايل قونىستارىن زاڭسىز دەپ قاراۋ قايشىلىقتى جەڭىلدەتپەيدى»، – دەگەن رەسمي مالىمدەمەدە.

اقش تارابى پرەزيدەنت ترامپ كەزەڭىندە ءيزرايلدىڭ پالەستيناعا باعىتتاعان بىرقاتار قادامدارىنا قولداۋ كورسەتىپ كەلەدى. پرەزيدەنت وباما تۇسىنداعى كەيبىر زاڭدار ترامپ بيلىگى كەزىندە وزگەردى. سونىڭ ىشىندە باتىس جاعالاۋداعى كۇشتەپ سالىنعان ەۆرەي قونىستارى تۋرالى زاڭ دا بار. ەۆرەي مەملەكەتىنىڭ باسشىسى نەتانياحۋ اقش-تىڭ كەزەكتى شەشىمى «تاريحي قاتەلىكتى تۇزەتۋ» دەپ باعالاعان.

پالەستينالىقتاردىڭ قىستاعى جانە ەۆرەي قونىستارى. فوتو: BBC.

پالەستينالىقتار كوبىرەك قونىستانعان باتىس جاعالاۋ ايماعى 1967 جىلعى 6 كۇندىك سوعىستان كەيىن يزرايل جاعىنان جارتىلاي وككۋپاتسيالانعان. ال، پالەستينالىقتار باتىس جاعالاۋ بولاشاقتا تاۋەلسىز پالەستينانىڭ تەرريتورياسى بولۋى كەرەك دەپ قارايدى.

يزرايلمەن كەلىسسوز جۇرگىزىپ جاتقان پالەستينا تارابىنىڭ وكىلدەرى اقش شەشىمى «تىنىشتىققا، بەيبىتشىلىككە جانە تۇراقتىلىققا قاتەر توندىرەدى» دەپ باعالادى.

باتىس جيەك جانە يەرۋساليم قالاسىنىڭ شىعىسىندا 140-تان استام ەۆرەي قۇرىلىستارىندا 600 مىڭنان استام تۇرعىن بار. حالىقارالىق زاڭ بويىنشا بۇلار زاڭسىز قونىستانۋ، جاۋلاۋ ارەكەتى قاتارىندا قارالادى. الايدا، يزرايل بيلىگى ونى جوققا شىعارادى. بۇل يزرايل-پالەستينا اراسىنداعى ەڭ داۋلى ماسەلەنىڭ ءبىرى

“The Qazaq Times”